უზენაესი სასამართლოს მოსამართლეობის კანდიდატებთან გასაუბრება შესაძლოა, დროებით შეწყდეს და სექტემბერში გაგრძელდეს. ამის შესახებ საბჭოს მოსამართლე წევრმა, დიმიტრი გვრიტიშვილმა განაცხადა. როგორც მან თქვა, ჯერჯერობით გასაუბრება ჩვეული გრაფიკით მიმდინარეობს.

"არ არის გამორიცხული, რომ, ვთქვათ, გასაუბრება რაღაც ეტაპზე შეწყდეს და გაგრძელდეს სექტემბერში. ამაზე მყარად ჩამოყალიბებული, ანუ გადაწყვეტილება საბჭოს წევრებს მიღებული არ გვაქვს", — აღნიშნა გვრიტიშვილმა.

უზენაესის მოსამართლეობის 50 კანდიდატთან იუსტიციის უმაღლესმა საბჭომ გასაუბრება 17 ივლისს დაიწყო. თავდაპირველად დაგეგმილი იყო, რომ საბჭოს წევრები დღეში ხუთ კანდიდატს უნდა გასაუბრებოდნენ, თუმცა არამოსამართლე წევრებისა და არასამთავრობოების პროტესტის შემდეგ საბჭო დღეში მხოლოდ ორ კანდიდატს ესაუბრება.