ეკონომიკის ყოფილი მინისტრი, გიორგი ქობულია ამბობს, რომ 20 ივნისს განვითარებული მოვლენებმა ქვეყნის ეკონომიკას დიდი ზიანი მიაყენა. მისივე თქმით, ოპოზიციის კონფლიქტისკენ წაქეზებას გამართლება არ აქვს, მაგრამ ქვეყნის მართვაზე სრული პასუხისმგებლობა მთავრობას მოეთხოვება.

"აქ არ არის მხოლოდ ლაპარაკი, რომ რუსეთიდან დავკარგეთ ტურისტული ნაკადი. აგრეთვე ამან კიდევ უფრო დააფრთხო საერთაშორისო ინვესტორები, ვინც აპირებდა ან აპირებს საქართველოში ინვესტირება განახორციელოს", — აღნიშნა ქობულიამ გადაცემა პირველებში.

მისივე თქმით, 20 ივნისს ხალხი ქუჩაში მმართველობის სისტემის მიმართ უკმაყოფილების გამო გამოვიდა:

"სერგეი] გავრილოვის შედეგი, თავისთავად, აღმაშფოთებელი საზოგადოებისთვის. მაგრამ ეს იყო საბაბი. მგონია, რომ ეს შემთხვევა რომ არ ყოფილიყო, იქნებოდა სხვა რომელიც გამოიწვევდა იგივე იგივე უკმაყოფილებას".

20 ივნისის აქცია

19-22 ივნისს ზაქარია ქუცნაშვილის ორგანიზებით თბილისში მართლმადიდებლობის საპარლამენტთაშორისო ასამბლეა უნდა გამართულიყო, რომლის ფარგლებში რუსი დეპუტატები საქართველოში ჩამოვიდნენ. 20 ივნისს ორგანიზაციის პრეზიდენტი, რუსი დეპუტატი სერგეი გავრილოვი ასამბლეის სესიის წაყვანისთვის პარლამენტში, ირაკლი კობახიძის სავარძელზე დაჯდა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს". ოპოზიციის პროტესტის შემდეგ ასამბლეა შეწყდა, ხოლო ზაქარია ქუცნაშვილმა განაცხადა, რომ დეპუტატის მანდატს დატოვებდა.

გავრილოვის მიერ სკამის დაკავებას საპროტესტო ტალღა მოჰყვა სამოქალაქო სექტორშიც. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო. სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს.

აქციის დაშლის დროს კლინიკებში 240 მოქალაქე გადაიყვანეს, რომელთაგან 80 სამართალდამცავი იყო. დაშავებულებიდან 2-მა თვალი დაკარგა, მათ შორის 18 წლის გოგომ. დაზიანებები მიიღეს 30-ზე მეტმა ჟურნალისტმა, მათ შორის იყვნენ On.ge-ს სამი თანამშრომელი. შინაგან საქმეთა სამინისტრომ იმავეს ღამეს სხვადასხვა სამართალდარღვევისთვის ჯამში 305 ადამიანი დააკავა.