რუსთავი 2-ის დამფუძნებელი, დავით დვალი ამბობს, რომ, სავარაუდოდ, შაბათ-კვირას, 27-28 ივლისს ტელეკომპანიის მფლობელს, ქიბარ ხალვაშს შეხვდებიან. ამის შესახებ მან პარლამენტში განაცხადა.

დღეს, 26 ივლისს პარლამენტის ოპოზიციონერი დეპუტატები რუსთავი 2-ის დამფუძნებლებს, ჯარჯი აქიმიძესა და დავით დვალს ხვდებიან. დვალის თქმით, ისინი უკვე შეხვდნენ არხის ახალ დირექტორს პაატა სალიას. მისივე თქმით, მას არ სჯერა რუსთავი 2-ის სარედაქციო დამოუკიდებლობის შენარჩუნების.

"იცით, რაშია საქმე, რომ ცარიელ დაპირებებად მეჩვენება ეს ყველაფერი, მგონია, რომ არც ბორდი უშველის მაგას, არც დადებული კონტრაქტები, ანალოგია, რაც გამოჩნდა, პირველად, ქიბარმა რომ ახსენა, რომ რაღაც უცხოელ მენეჯერს მოიყვანს, თვალწინ ის იორდანი და NTV-ში დატრიალებული ამბავი, რომელიც რაღაც პერიოდი, შედარებით თავისუფალი რეჟიმით დატოვეს და საბოლოო ჯამში, მიიღეს მონსტრი, მდაბიო, ყვითელ პრესად გადაკეთებული სრულიად უმსგავსი ტელევიზია. მე ვერ ვხედავ რეალურად გარანტიებს", — აღნიშნა დავით დვალმა.