FIFA-ს ახალი პრეზიდენტი ჯანი ინფანტინო 48 გუნდიანი მსოფლიო ჩემპიონატის ჩატარებას გეგმავს.

ახალი ფორმატი შესაძლოა 2026 წლიდან დაინერგოს.

Associated Press-ის ცნობით, ინფანტინოს აზრით, მონაწილე გუნდების რაოდენობა მეტ ქვეყანასა და რეგიონს გააბედნიერებს.

გარდა გლობალური ბედნიერებისა FIFA-ს ფინანსური ინტერესიც აქვს. ჩემპიონატში მეტი გუნდის ჩართვა, მეტ მატჩებს ნიშნავს, შესაბამისად მეტი შემოსავალი იქნება სატელევიზიო გაყიდვებისა და მარკეტინგიდან. AP-ს ცნობით, 2014 წლის მსოფლიო ჩემპიონატის შედეგად FIFA-მ $5 მილიარდი შემოსავალი მიიღო.

როგორც Reuters იუწყება, ინფანტინოს უკვე მოფიქრებული აქვს ახალი ფორმატი. ახალ სისტემაში, 16 გუნდი ჯგუფურ ეტაპზე პირდაპირ გავა, ხოლო 32 ნაკრები თითო თამაშს ე.წ. წინასაჩემპიონატო მატჩებში ითამაშებს. ამ ფაზაში გამარჯვებულები დანარჩენ 16 გუნდს შეუერთდებიან და ფინალურ ეტაპზე კვლავ 32 მონაწილე იასპარეზებს.

ინფანტინოს საარჩევნო დაპირება, FIFA-ს საპრეზიდენტო არჩევნებში მსოფლიო ჩემპიონატის მონაწილეთა რაოდენობის ორმოცამდე გაზრდა იყო, მაგრამ, როგორც ჩანს, ორგანიზაციას კიდევ უფრო შორს უნდა წასვლა.

შეგახსენებთ, რომ მსოფლიო ჩემპიონატის მონაწილეთა რაოდენობის ბოლო ზრდა 1998 წელს იყო, როცა ჩემპიონატში 24 გუნდის ნაცვლად 32 ჩაერთო.