ტელეკომპანია რუსთავი 2-ის დამფუძნებლის დავით დვალის განცხადებით, იგი ბიძინა ივანიშვილს გულისხმობდა, როდესაც თქვა, რომ "მათსა და სამართლიანობის აღდგენას შორის ერთი ადამიანი დგას".

"რა თქმა უნდა, ბიძინა ივანიშვილს ვგულისხმობდი, რადგან, როგორც ჩანს ის წყვეტს, დათმობს თუ არა წილს ქიბარ ხალვაში და რამდენს და ასევე, საერთოდ მიგვიშვებენ თუ არა რუსთავი 2-თან", — ამის შესახებ დვალმა რუსთავი 2-თან საუბრისას თქვა. მისივე ცნობით, დღევანდელ განცხადებაში მან აქცენტი სამართლებრივი მექანიზმის ქონაზე გააკეთა, თუმცა იქვე აღნიშნავს, რომ არც საგამოძიებო უწყებას ენდობა:

"ზუსტად აქ მგონია პრობლემა, რომ ბიძინა ივანიშვილი, არა მარტო ქიბარ ხალვაში რას იტყვის იმას წყვეტს, არამედ, არამედ იმასაც, რომ პროკურატურა დუმს და თაროზე აქვს შემოდებული ჩვენი საქმე".

დავით დვალი ვარაუდობს, რომ ის ფორმა, როგორიც იყო რუსთავი 2, "სამწუხაროდ, აღარ იქნება". ის ამბობს, რომ ეს იქნება ძალიან ცუდი ქვეყნის განვითარებისთვის:

"არ მჯერა, პირდაპირ ვიძახი, იმ განცხადების რომ სარედაქციო პოლიტიკა ხელუხლებელი იქნება".

დღეს, 22 ივლისს ტელეკომპანია რუსთავი 2-ის დამფუძნებლებმა, ჯარჯი აქიმიძემ და დავით დვალმა ერთობლივ განცხადებაში აღნიშნეს, რომ მათ საქმეზე სახელმწიფოს უმოქმედობაა და ერთი კაცის ნების ამარა არიან დარჩენილი.

"დღეს ჩვენსა და სამართლიანობის აღდგენას შორის, ჩვენსა და ჩვენ მიერვე დაფუძნებულ ტელევიზიას შორის ერთი ადამიანი დგას და ის არ არის ქიბარ ხალვაში. ვიმეორებთ, სამართლიანობა აღდგება მხოლოდ მაშინ, როდესაც რუსთავი 2 დაუბრუნდება მის დამფუძნებლებს", — ვკითხულობთ განცხადებაში.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი ქიბარ ხალვაშს მიაკუთვნეს.

2004 წლის ზაფხულში ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც დავით დვალსა და ჯარჯი აქიმიძეს კუთვნილი 30-30 პროცენტიანი წილის დათმობა მოუწიათ.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირებასთან ერთად მან არხის წილები დათმო . საბოლოოდ, 2011 წელს, კომპანიის მფლობელები შპს საქართველო და ძმები ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.