ტელეკომპანია რუსთავი 2-ის დამფუძნებელი დავით დვალი ტელეკომპანიის გასხვისებასთან დაკავშირებით ირაკლი ოქრუაშვილის პროკურატურაში დაკითხვის ფრაგმენტს ასაჯაროებს. დღეს ოქრუაშვილი აცხადებს, რომ არხი მას ეკუთვნის და არა ქიბარ ხალვაშს, რომელმაც სასამართლომ ტელევიზიის 100 პროცენტი მიაკუთვნა.

როგორც გასაჯაროებულ ინფორმაციაშია აღნიშნული, რუსთავი 2-ის მაშინდელ მფლობელთან ეროსი კიწმარიშვილთან მოლაპარაკებას თავად ირაკლი ოქრუაშვილი აწარმოებდა, დვალთან და ჯარჯი აქიმიძესთან დაძაბული ურთიერთობის გამო მათთან კომუნიკაცია მაშინდელ მაღალჩინოსნებს ზურაბ ადეიშვილსა და ვანო მერაბიშვილს დაევალათ.

"ერთ-ერთ შეხვედრაზე ადეიშვილმა და მერაბიშვილმა მითხრეს, რომ აქიმიძე და დვალი წილის გასხვისებაზე უარს აცხადებდნენ და მათთან მოლაპარაკების გზით შედეგს ვერ მიაღწევდნენ. მათი განმარტებით, საჭირო იყო გარკვეული ხერხებით მათთვის ეიძულებინათ ტელევიზიის წილების დათმობა. კონკრეტულად იძულების რა ხერხების გამოყენებას აპირებდნენ ჩემთვის არ უთქვამთ… ივნისში შეხვედრისას მათ მითხრეს, რომ მათმა ჩანაფიქრმა გაამართლა და მათი ძალისხმევის შედეგად დვალი და აქიმიძე თანახმა იყვნენ წილების გასხვისებაზე. საჭირო იყო ახალი მფლობელის მოძებნა", — ვკითხულობთ დვალის მიერ გავრცელებულ დოკუმენტში.

კითხვა: რა შეგიძლიათ თქვათ გაკოტრების საქმის შესახებ?

პასუხი: როგორც აღვნიშნე, დვალი და აქიმიძე თავდაპირველად უარს აცხადებენ წილების გასხვისებაზე ამისთვის ადეიშვილს და მერაბიშვილს სჭირდებოდათ გარკვეული მექანიზმები მათ დასაყოლიებლად. ჩემი ინფორმაციით, რუსთავი 2-ის გაკოტრების საქმე ერასტიმ წამოიწყო ადეიშვილის მითითებით და ეს დამატებითი ბერკეტი იყო დამფუძნებლებისათვის წილების დასათმობად.

პროკურატურა ინფორმირებულია რუსთავი 2-ის საქმეზე გავრცელებული დაკითხვის ჩანაწერის შინაარსთან დაკავშირებით, თუმცა On.ge-მ ამ დრომდე მათგან კომენტარის მიღება ვერ შეძლო.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი ქიბარ ხალვაშს მიაკუთვნეს.

2004 წლის ზაფხულში ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც დავით დვალსა და ჯარჯი აქიმიძეს კუთვნილი 30-30 პროცენტიანი წილის დათმობა მოუწიათ.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირებასთან ერთად მან არხის წილები დათმო . საბოლოოდ, 2011 წელს, კომპანიის მფლობელები შპს საქართველო და ძმები ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.