კოალიცია "დამოუკიდებელი და გამჭვირვალე მართლმსაჯულებისთვის" შეფასებით, უზენაესი სასამართლოს მოსამართლეობის კანდიდატთა შერჩევის პროცესში არსებული პრობლემები ხელს უშლის გამჭირვალობას და ლეგიტიმურობას.

კოალიციის განცხადებით, პრობლემურ საკითხებს შორისაა უზენაესი სასამართლოს მოსამართლეობის კანდიდატების, ზურაბ აზნაურაშვილისა და ლევან თევზაძის ინტერესთა კონფლიქტი. ზურაბ აზნაურაშვილი იუსტიციის საბჭოს წევრის, თამარ ონიანის მაზლია, ლევან თევაზძე კი, ასევე, საბჭოს წევრის, ირაკლი შენგელიას ცოლის ძმა.

კოალიციამ 2019 წლის 14 მაისს პარლამენტის თავმჯდომარეს მიმართა მოსამართლეთა შერჩევის პროცედურაში საბჭოს არამოსამართლე წევრის, ზაზა ხარებავას მონაწილეობის შესახებ. მათი თქმით, პარლამენტს ამ საკითხზე არ უმსჯელია.

არასამთავრობოების აზრით, კიდევ ერთი პრობლემაა, გიორგი მიქაუტაძე, რომელიც მოსამართლეობის ერთ-ერთი კანდიდატი და ასევე იუსტიციის საბჭოს მდივანია.

"საყურადღებოა, რომ სწორედ ეს უკანასკნელია უზენაესი სასამართლოს მოსამართლეობის მსურველ პირთა შესახებ ინფორმაციის შეგროვებასა და გადამოწმებაზე უფლებამოსილი სტრუქტურული ერთეული. შესაბამისად, გიორგი მიქაუტაძეს კვლავ რჩება ბერკეტი, ზეგავლენა მოახდინოს უზენაესი სასამართლოს მოსამართლეობის კანდიდატთა შესარჩევ პროცედურაზე", — წერია განცხადებაში.

გარდა ამისა, კოალიციას კითხვებს უჩენს მოსამართლეთა შერჩევის ეტაპზე კენჭისყრის შედეგები. მათი თქმით, კენჭისყრის ბიულეტენები ერთიანი სქემით იყო შემოხაზული და დამთხვევების მაღალი ხარისხი ჰქონდა.

"ცალსახაა, რომ თუ საბჭოს თითოეული წევრი ერთმანეთისგან სრულიად დამოუკიდებლად და წინასწარი კომუნიკაციის (შეთანხმების) გარეშე მისცემდნენ ხმას სასურველ 20 კანდიდატს, კენჭისყრის ფარულობის გათვალისწინებით, ფაქტობრივად შეუძლებელი იქნებოდა მათ მიერ შერჩეული კანდიდატების ასეთი ზუსტი დამთხვევა", — წერია განცხადებაში.

განცხადებაში ასევე აღნიშნულია, რომ არასამთავრობო ორგანიზაციას "საერთაშორისო გამჭვირვალობა - საქართველოს" მოსმართლეობის 20 კანდიდატის მიერ წარმოდგენილი დოკუმენტები მხოლოდ მას შემდეგ გაუსაჯაროვეს, რაც სახალხო დამცველისა და პერსონალურ მონაცემთა დაცვის ინსპექტორის წარმომადგენელთა განცხადებები მოისმინეს. მანამდე პერსონალური მონაცემების დაცვის მოტივით საბჭომ უარი განაცხადა.

კოალიციის აზრით, მაშინ, როცა ქვეყნის ისტორიაში უპრეცედენტო რაოდენობის უზენაესი სასამართლოს მოსამართლეთა არჩევა მიმდინარეობს, მნიშვნელოვანია, რომ "შერჩევის პროცესი მიმდინარეობდეს ღია და გამჭვირვალედ და არ ტოვებდეს ისეთ კითხვებს, რაც მომავალში ჩრდილს მიაყენებს თავად შერჩეული კანდიდატების ლეგიტიმაციას".

კოალიცია მოუწოდებს:

  • იუსტიციის უმაღლეს საბჭოს — კანდიდატებთან გასაუბრების ეტაპზე უზრუნველყოს პროცესის სრული გამჭვირვალობა, კანდიდატებთან გასაუბრებას დაეთმოს გონივრული დრო და საბჭოს წევრებმა დასვან ყველა ის შეკითხვა, რომელიც საზოგადოებას საშუალებას მისცემს მიიღონ სათანადო ინფორმაცია კანდიდატის წარსულის, მისი პროფესიული გამოცდილების, ღირებულებებისა და ფასეულობების შესახებ;
  • იუსტიციის უმაღლესი საბჭოს მდივანს, გიორგი მიქაუტაძეს: ინტერესთა კონფლიქტის თავიდან აცილების მიზნით, უარი თქვას საბჭოს მდივნის მოვალეობების შესრულებაზე ან უზენაესი სასამართლოს მოსამართლეობის კანდიდატობაზე;
  • იუსტიციის უმაღლესი საბჭოს წევრებს თამარ ონიანს და ირაკლი შენგელიას: არ მიიღონ მონაწილეობა უზენაესი სასამართლოს მოსამართლეობის კანდიდატების შერჩევის პროცედურებში;
  • საქართველოს პარლამენტს: დროულად განიხილოს საბჭოს არამოსამართლე წევრის, ზაზა ხარებავასთვის, უფლებამოსილების შეწყვეტის საკითხი.