საქართველოს დემოკრატიული ინიციატივა 2012-2016 წლებში მედიის თავისუფლების საკითხებსა და ამ სფეროში არსებული პრობლემების შესახებ ანგარიშს აქვეყნებს, რომლის თანახმადაც ხელისუფლებას ჰქონდა არაერთი მცდელობა, საკუთარი გავლენის ქვეშ მოექცია ესა თუ ის ტელეარხი და ჰქონოდა ზეგავლენა მის სარედაქციო პოლიტიკაზე.

ორგანიზაცია ამბობს, რომ ხელისუფლების სურვილია, სრული ან მნიშვნელოვანი გავლენა იქონიოს ქვეყანაში მოქმედ ყველა წამყვან ტელემაუწყებელზე. როგორც ანგარიში ცხადყოფს, საზოგადოებრივ მაუწყებელზე, ტელეკომპანია იმედსა და ტელეკომპანია მაესტროზე გადაცემების დახურვისა და ჟურნალისტებთან შრომით-სამართლებრივი ურთიერთობის შეწყვეტის მოტივი, პირდაპირ ან ირიბად, სწორედ ხელისუფლებისადმი არალოიალური დამოკიდებულება ან ხელისუფლების მიერ დაწუნებული სარედაქციო პოლიტიკა გახდა:

"რუსთავი 2-ის სარედაქციო პოლიტიკის მკვეთრი ცვლილებისთვის ხელისუფლების ბრძოლა, ყველაზე თვალნათლივ მედიამფლობელთა წინააღმდეგ სამართლებრივი დავის სახით წარმოგვიდგება".

GDI-ის მიერ გამოქვეყნებული ანგარიში მხოლოდ სატელევიზიო მაუწყებელს ეხება. ანგარიშში მიმოხილულია საზოგადოებრივი მაუწყებლის ირგვლივ განვითარებულ მოვლენები, რაც როგორც რამდენიმე თოქშოუს დახურვას, ასევე მაუწყებლის სამეურვეო საბჭოს ძველი შემადგენლობისთვის ვადამდე უფლებამოსილების შეწყვეტასა და საგადასახადო შემოწმების დაწყებას მოიცავს:

"ადგილობრივი და საერთაშორისო საზოგადოების განსაკუთრებული ყურადღება მიიპყრო ხელისუფლების მიმართ კრიტიკულად განწყობილი ტელეკომპანია რუსთავი 2-ის ირგვლივ განვითარებულმა მოვლენებმა, რასაც ანგარიშის დიდი ნაწილი ეთმობა".

გარდა ამისა, ანგარიშში საუბარია სხვადასხვა ტელეკომპანიებიდან ჟურნალისტების დაუსაბუთებელი და ზოგიერთ შემთხვევაში უკანონო გათავისუფლების, სარედაქციო დამოუკიდებლობაში ჩარევის, ჟურნალისტებზე ფიზიკური ანგარიშსწორებისა და სხვა მსგავსი ფაქტები:

"უკანასკნელ პერიოდში განხორციელებული საკანონმდებლო ცვლილებების ანალიზი აჩვენებს, რომ სახელმწიფო ხშირ შემთხვევაში არ ითვალისწინებს კანონმდებლობის ცვლილებების პრაქტიკულ უარყოფით შედეგებს ან მიზანმიმართულად უგულებელყოფს მათ ზოგიერთი მაუწყებლისადმი ზიანის მიყენების მოტივით".