საქართველომ ჰაკერის, იაროსლავ სუმბაევის რუსეთში ექსტრადიცია დროებით შეაჩერა. როგორც პროკურატურაში On.ge-ს უთხრეს, უზენაესმა სასამართლომ ექსტრადიციის ნაწილი დააკმაყოფილა, თუმცა გადაწყვეტილება შეაჩერა, რადგან პარალელურად სააპელაციო სასამართლოში სუმბაევისთვის თავშესაფრის მინიჭების საკითხზე იმსჯელებენ.

რუსეთში 28 წლის იაროსლავ სუმბაევს თაღლითობაში სდებენ ბრალს. გამოძიების ინფორმაციით, 2013-2014 წლებში ჰაკერები, მათ შორის სუმბაევი, ტუროპერატორებისგან მოპარული მონაცემებით რკინიგზის ფიქტიურ ბილეთებს აფორმებდნენ. გარდა ამისა, ჰაკერი ეჭვმიტანილია გამომძიებელ ევგენია შიშკინას მკვლელობის შეკვეთის მონაწილეობაშია ეჭვმიტანილი. შიშკინა 2018 წლის 10 ოქტომბერს საკუთარ სახლთან მოკლეს.

ჰაკერი საქართველოში 2018 წელს დააკავეს. ადვოკატი ამბობს, რომ მისი დააცვის ქვეშ მყოფი კიბერდანაშაულის ბრალდებას აღიარებეს, ხოლო მკვლელობაში მონაწილეობას უარყოფს. მისივე თქმით, რუსეთში ექსტრადიციის შემთხვევაში სუმბაევს სასჯელის უმაღლეს ზომა ელის, რის გამოც პოლიტიკური თავშესაფარი ითხოვა. თბილისის საქალაქო სასამართლომ ექსტრადიციის საკითხი ჯერ კიდევ მიმდინარე წლის მაისში დააკმაყოფილა, თუმცა ადვოკატებმა გადაწყვეტილება გაასაჩივრეს.

რუსული გამოცემა კომერსანტი აღნიშნავს, რომ რუსულმა მხარემ ჰაკერის ექსტრადიცია კიბერდანაშაულის და არა გამომძიებლის მკვლელობის საქმეზე ითხოვა. მათივე მტკიცებით, ხელისუფლებამ სუმბაევის ექსტრადიცია მას შემდეგ გადადო, რაც მედიაში სუმბაევის საქმის პოლიტიკურ სარჩულზე დაიწყეს საუბარი: თითქოსდა ის რუსეთის მხრიდან სხვა სახელმწიფოების შიდა საქმეებში ჩარევის შესახებ ინფორმაციას ფლობდა.