"ფუი", — ასე შეაფასა აქცია #სირცხვილიას ორგანიზატორმა, შოთა დიმღელაშვილმა მმართველი პარტიის დეპუტატის, აკაკი ზოიძის განცხადება. ზოიძემ პროტესტის მონაწილეებს მტრები და მეხუთე კოლონა უწოდა.

დიღმელაშვილმა თქვა, რომ ზოიძეს პატივს სცემდა იქამდე, სანამ მან შინაგან საქმეთა მინისტრის ქმედებების გამართლება დაიწყო. მისი თქმით, ამ განცხადებით, დეპუტატმა, საბოლოოდ, წარმოაჩინა საკუთარი სახე.

"ერთ შანსს მოგცემთ და ბოდიშის მოსახდელად დაგითმობთ ამ სცენას", — აღნიშნა დიღმელაშვილმა.

ეს განცხადება ზოიძემ ტელეკომპანია პირველის ეთერში გააკეთა. წამყვანმა, ნინო ჟიჟილაშვილმა დეპუტატს სთხოვა შეეფასებინა პრეზიდენტ სალომე ზურაბიშვილის განცხადება. ჟიჟილაშვილმა აღნიშნა, რომ პრეზიდენტი იყო კრიტიკული საკუთარი მოსახლეობის და აქციის მონაწილეების მიმართ, რაზეც ზოიძემ უპასუხა:

"არანაირი მოქალაქეები, ესენი არიან მტრები და მეხუთე კოლონა. აი, მაგი არის თავზე ხელს, რომ უსვამთ. რა მოქალაქეები წარმოიდგინეთ, რისი გულისთვის აკეთებენ ამას".

ზოიძემ განაცხადა, რომ აქციაზე ნაციონალური მოძრაობის წევრები იდგნენ. წამყვანმა, ნინო ჟიჟილაშვილმა მას დაუზუსტა, რომ აქციაზე მყოფ ახალგაზრდებს გულისხმობდა, რომლებიც გავრილოვის ვიზიტს და შემდგომ განვითარებულ მოვლენებს აპროტესტებდნენ, რაზეც ზოიძემ განაცხადა: "კი, ბატონო, არიან იქ ახალგაზრდები, რომლებიც თვლიან, რომ გახარიას გადადგომაა მთავარი".