ენგურის ხიდზე მოძრაობა ცალმხრივად ჩაიკეტა. ოკუპირებული აფხაზეთიდან მოქალაქეებს ზუგდიდში აღარ ატარებენ. აფხაზეთში გადასვლის უფლება მხოლოდ ე.წ. აფხაზური პასპორტების ან მიწვევის მქონე პირებს აქვთ.

გადაწყვეტილება ე.წ. პარლამენტმა 25 ივნისის სხდომაზე მოითხოვა და ე.წ. პრეზიდენტს მიმართვაც გაუგზავნა. საზოგადოებრივი მაუწყებლის ცნობით, მიზეზად რუსი დეპუტატის, გავრილოვისადმი საქართველოს პარლამენტის წევრის, აკაკი ბობოხიძის სიტყვები დასახელდა.

აკაკი ბობოხიძე აცხადებს, რომ რაულ ხაჯიმბა ტამაშობს "პრეზიდენტობანას" და "სახელმწიფოებრიობანას".

"ხაჯიმბა ჩემს განცხადებებთან არაფერ შუაშია, თუმცა მე ვადასტურებ, რომ მძიმე სიტყვები ვთქვი და გავრილოვს ვუთხარი: "გკლავდით და მომავალშიც დაგხოცავთ". მე ვგულისხმობდი, რომ ვიბრძოდი და მომავალშიც მზად ვარ ვიბრძოლო ოკუპაციის წინააღმდეგ", — განუცხადა ჟურნალისტებს ბობოხიძემ.

შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა განაცხადა, რომ მისთის, ახლა მთავარ პრიორიტეტს წარმოადგენს იმ ადამიანების ინტერესებზე ზრუნვა, რომლებიც ამ უკანონო შეზღუდვით ყველაზე მეტად ზარალდებიან.

"მე ვიცი, რომ ერთ-ერთი ყველაზე მძიმე გამოწვევა და წუხილი, რომელიც ჩვენს მოსახლეობას აქვს, ახალგაზრდების გადაადგილებას უკავშირდება, მათ მონაწილეობას ეროვნულ გამოცდებში. ჩვენ განათლების სამინისტროსთან ერთად ვმუშაობთ, რათა გალელ აბიტურიენტებს არ ჰქონდეთ შეფერხება საქართველოს კონტროლირებად ტერიტორიაზე უმაღლეს სასწავლებლებში წვდომაზე", — განაცხადა ქეთევან ციხელაშვილმა.

მისივე თქმით, სურს დააიმედოს მოსახლეობა, რომ ყველა ნაბიჯი ახლაც და შემდგომაც, განსაზღვრული იქნება მათი ინტერესების მიხედვით და მათ დასახმარებლად მაქსიმალურს გააკეთებენ.

"პოლიტიკურ შეფასებებს ცოტა მოგვიანებით გავაკეთებ, ახლა ჩემთვის მთავარი პრიორიტეტი ისაა, რომ მოსახლების ინტერესები არ დაზარალდეს და ყველაფერი ვცადოთ, რათა უკანონო შეზღუდვა მაქსიმალურად მოკლე ვადაში გაუქმდეს", — განაცხადა სახელმწიფო მინისტრმა.