ნაციონალური მოძრაობის დეპუტატი, რომან გოცირიძე ფიქრობს, რომ მმართველმა გუნდმა პრემიერ-მინისტრი გადამალა. მისი შეფასებით, პრემიერ-მინისტრს სათქმელი არაფერი აქვს. ასევე, მან უნდა გამოიაროს ის ქუჩა, სადაც "სისხლი დაიღვარა".

"გადამალეს პრემიერ-მინისტრი სადღაც ჩირგვებში. ან რა უნდა ეთქვათ? ლარი ჩამოშლილია, ქვეყნიდან გაქცეულია ხალხი, უმუშევრობა და სიღარიბეა, ფასების ზრდაა. პრემიერ-მინისტრს უნდა გამოეარა ის ქუჩა, სადაც დაიღვარა სისხლი და ამ დარბაზში პრემიერ-მინისტრს დახვდებოდა მათი გუნდის მიერ მიღებული გადაწყვეტილება, რომელიც ეხება ნიკა მელიასადმი სანქციის მიცემას. ბუნებრივია, ის ვერ გაუძლებდა კითხვებს და გულისწყრომას, წავიდნენ ჩირგვებში, გამოვიყვანთ", — თქვა რომან გოცირიძემ.

საქართველოს პრემიერ-მინისტრი, მამუკა ბახტაძე პარლამენტში მთავრობის საქმიანობის წარსადგენად პარლამენტში აღარ მოდის. ამის შესახებ ბიუროს სხდომაზე გახდა ცნობილი. თუ მამუკა ბახტაძე პარლამენტში ხვალ დღის ბოლომდე ანგარიშით არ წარსდგება, ის რეგლამენტს დაარღვევს.

"არსებულ ვითარებაში შეუძლებელი იქნება სამთავრობო პროგრამის განხილვა, ახალი თარიღის განსაზრის მიზნით კონსულტაციები დაიწყო და შეიძლება, რიგგარეშე სხდომაზეც დაინიშნოს პრემიერის მოსმენა", — განაცხადა პარლამენტის თავმჯდომარემ არჩილ თალაკვაძემ.

პარლამენტის რეგლამენტით, საქართველოს პრემიერ-მინისტრი ვალდებულია წელიწადში ერთხელ, საგაზაფხულო სესიის პლენარული სხდომების ბოლო თვეში პარლამენტს წარუდგინოს მოხსენება სამთავრობო პროგრამის შესრულების მიმდინარეობის შესახებ. აღნიშნული მოხსენება წერილობითი ფორმით პარლამენტს უკვე წარედგინა. საგაზაფხულო სესიის პლენარული სხდომები ხვალ, 28 ივნისს სრულდება.