ნაციონალური მოძრაობის დეპუტატი რომან გოცირიძე უმრავლესობას მოუწოდებს მხარი არ დაუჭირონ საქართველოს პროკურატურის მომართვას და ნაციონალური მოძრაობის დეპუტატს ნიკა მელიას დეპუტატის იმუნიტეტი არ შეუჩერონ.

"ეს ახლა, რაც ხდება, ფაქტობრივად, მყარდება პოლიტიკური დიქტატურა და იწყება პოლიტიკური რეპრესიები ქვეყანაში. მე მოგიწოდებთ პარლამენტს თითოეულ თქვენგანს, რომელმაც ამ მომართვას უნდა უყაროს კენჭი, ნუ ჩაიდენთ დანაშაულს. ნუ შეუწყობთ ხელს ქვეყანაში მძიმე ვითარების შექმნას. ეს არის პირდაპირ პოლიტიკური დევნა. თითოეულ ადამიანს, ვინც ამ წინადადებას მისცემს ხმას, გაასამართლებს ისტორია, გაასამართლებს კანონი და გაგასამართლებენ საკუთარ ოჯახში", — განაცხადა რომან გოცირიძემ.

მისი თქმით, ეს არ არის ეს მუქარა და მმართველი გუნდი უმძიმე მდგომარეობაში არიან.

"თქვენ ამ შემთხვევაში ხართ უმძიმეს მდგომარეობაში. თქვენ ხართ მხოლოდ და მხოლოდ ივანიშვილის სურვილის შემსრულებელი ივანიშვილს, რის გამოც ძალიან მძიმედ მოუწევს პასუხისგება. არ მოგივიდეთ ისე, რომ ერთ ვერტმფრენში დათმოთ თქვენი შვიდი მილიონი. რასაც სჩადიხართ ეს არის უკანონობა ქართული დემოკრატიის წინაშე. მოგიწოდებთ, არ მისცეთ ამ წინადადებას ხმა და პარლამენტს მივმართავთ გამოიჩინოს პოლიტიკური სიბრძნე პერსონალური კეთილსინდისიერება და ამ რეპრესიულ გადაწყვეტილებას მხარი არ დაუჭირონ", — განაცხადა რომან გოცირიძემ.

ერთიანი ნაციონალური მოძრაობის წევრს, დეპუტატ ნიკა მელიას, წარედგინილი ბრალდების დადგენილებით, ოთხიდან ცხრა წლამდე პატიმრობა ემუქრება. პროკურატურის განცხადებით, აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის მელიას მიმართ გამოტანილია ბრალდების დადგენილება სისხლის სამართლის კოდექსის 225-ე მუხლის პირველი და მეორე ნაწილებით.