საუდის არაბეთში მცხოვრები აბუ სინი მას შემდეგ დააპატიმრეს, რაც ამერიკელმა თინეიჯერმა ვლოგერმა, ქრისტინა კროკეტმა, მასთან ერთად გადაღებული ვიდეო Youtube-ზე გამოაქვეყნა. ბიჭს ბრალად არაეთიკური ქცევა დასდეს.

პოლიციის მტკიცებით, ვიდეო, რომელიც აბუ სინმა და ქრისტინამ გამოაქვეყნეს იყო მაცდური, არაეთიკური და იწევდა არასასურველ ყურადღებას მსოფლიოს მასშტაბით.

იუმორისტულ ვიდეოში ქრისტინა აბუს კალიფორნიიდან საუდის არაბეთში დაუკავშირდა.

თინეიჯერები ერთმანეთთან კომუნიკაციას ინგლისურ და არაბულ ენებზე ცდილობენ, რაც ვიდეოს სახალისოს ხდის.

აბუ სინი, რომელსაც მეტსახელად "უკბილოს" ეძახიან, ქრისტინას ტრადიციულ არაბულ სიმღერასაც უმღერის, შემდეგ კი ცოლად მოყვანას სთავაზობს.

პოლიციამ აბუ სინი კვირას დააპატიმრა, როდესაც ის ორ მეგობართან ერთად ერთ-ერთი აპლიკაციის დახმარებით სხვა ადამიანს ელაპარაკებოდა ქუვეითში. პოლიციამ ნივთმტკიცების სახით სახლიდან კომპიუტერი წაიღო და როგოც ოფიცერი ფავაზ ალ-მაიმანი ამბობს, ვლოგერი არაეთიკური საქციელის ბრალდებით განყოფილებაშია გადაყვანილი.

"მისმა ვიდეომ, სადაც ის არაეთიკურად იქცევა ბევრი კომენტარი და გამოხმაურება მიიღო, უმეტესობა მათგანი ჩვენი ქვეყნის მოქალაქე იყო და ისინი მის მიმართ უარყოფითად იყვნენ განწყობილები. აბუ სინი აუცილებლად უნდა დაისაჯოს", ამბობს პოლიციის ოფიცერი Saudigazette-თან ინტერვიუში.

როგორც აბუს ადვოკატი ირწმუნება, თუ მისი დაცვის ქვეშ მყოფს ბრალი დაუმტკიცდა, მას სამწლიან პატიმრობას მიუსჯიან.

როგორც ცნობილია, ცოტა ხნის წინ, საუდის არაბეთში ის მამაკაცები დააპატიმრეს, რომლებიც ჩახუტების საერთაშორისო დღის ღონისძიებაში იღებდნენ მონაწილეობას და გამვლელებს ეხუტებოდნენ.

ადამ კუგლი, რომელიც ახლო აღმოსავლეთში Human Rights Watch-ის წარმომადგენელია, ამბობს, რომ საუდის არაბეთში ხშირია მსგავსი ბუნდოვანი ბრალდებებით მოქალაქეების დაპატიმრება.

"ეს ფაქტი კიდევ ერთხელ გვიჩვენებს, რომ საუდის არაბეთის ხელისუფლება არ არის ღია და სენსიტიური საკუთარი მოქალაქეებისადმი და რომ აქ ჯერ კიდევ ბევრ თემას ადევს ტაბუ, რის გამოც მოქალაქეები საკუთარ აზრს ვერ აფიქსირებენ", ამბობს ადამ კუგლი.