უკრაინის ჯანდაცვის მინისტრი ულიანა სუპრუნი საქართველოს პარლამენტთან მიმდინარე ანტისაოკუპაციო აქციებს სოლიდარობას უცხადებს. ამის შესახებ მან ტვიტერზე ქართულად დაწერა.

"რუსეთი — ოკუპანტი" და "პუტინი — ხ*უილო" — ჭეშმარიტება, რომელიც არ იცვლება. ბოლო დღეებია ჩვენ ვხედავთ, როგორ სკანდირებენ ამას საქართველოში. იქ, სადაც ათობით ათასი მოქალაქე იცავს თავის სუვერენიტეტს, დემოკრატიასა და სახელმწიფოებრიობას აგრესორი ქვეყნის ჰიბრიდულ ომისაგან", — წერს ულიანა სუპრუნი.

საქართველოს პარლამენტთან მეხუთე დღეა აქციები მიმდინარეობს. აქციის მონაწილეებს რამდენიმე მოთხოვნა აქვთ. მათგან ერთ-ერთი არჩევნების 2020 წელს პროპორციული წესით ჩატარება უკვე დაკმაყოფილდა. შეუსრულებელია მოთხოვნები შს მინისტრის გიორგი გახარიას გადადგომისა და 20 ივნისის ღამით დაკავებულების გათავისუფლების შესახებ.

20-21 ივნისს პარლამენტთან მიმდინარე აქცია დაპირისპირებაში გადაიზარდა რა დროსაც, პოლიციამ ცრემლსადენი გაზით, რეზინის ტყვიებითა და წყლის ჭავლით აქცია დაშალა. მედიების გავრცელებულ კადრებში ჩანს, რომ სამართალდამცავები ახლო მანძილიდან უმიზნებდნენ შეუიარაღებელ ადამიანებს.

20 ივნისის აქციის დაშლის შედეგად:

  • ჯანდაცვის სამინისტროს მონაცემებით, კლინიკაში გადაიყვანეს 240 ადამიანი;
  • დაშავებულებიდან 2-მა თვალი დაკარგა, მათ შორის 18 წლის გოგომ;
  • აქციის მონაწილეებიდან 3 რეანიმაციულ განყოფილებაში, მართვით სუნთქვაზე იმყოფება;
  • დაშავდა მინიმუმ 34 ჟურნალისტი;
  • შსს-მ დააკავა აქციის 305 მონაწილე.

დღეს, 24 ივნისს, საქართველოს მთავარმა პროკურატურამ 20 ივნისის აქციის დაშლის დროს სამართალდამცავების მხრიდან შესაძლო უფლებამოსილების გადამეტების საკითხის გამოძიება დაიწყო. პროკურორმა საზოგადოებას თხოვნით მიმართა, რომ დამატებითი მტკიცებულებების არსებობის შემთხვევაში მიაწოდონ მათ.

გაიგე მეტი მოქალაქეების, დიპლომატების, კომპანიებისა და ქვეყნების სოლიდარობაზე: