20 ივნისის აქციის დაშლის დროს, რომელზეც მოქალაქეები ოკუპაციას და გავრილოვის ქმედებებს აპროტესტებდნენ, 240 ადამიანი დაშავდა, 305 მომიტინგე კი დააპატიმრეს.

დაშავებულთა შორის ყველაზე რთული იმ ადამიანების მდგომარეობა იყო, რომლებმაც თვალები დაკარგეს.

21 ივნისს კი ის სამოქალაქო სოლიდარობა ვიხილეთ, რომელიც კარგად ახსოვს საქართველოს 2015 წლის 13 ივნისის მოვლენებზე.

1. უფასო პლასტიკური დახმარება

Total Charm-ის პლასტიკურმა ქირურგმა, კონსტანტინ სულამანიძემ აქციის დროს დაშავებულ მოქალაქეებს უფასო დახმარება შესთავაზა:

"გუშინდელი აქციის შემდეგ, თუ ვინმეს გჭირდებათ ჩემი დახმარება, პლასტიკური ნაკერების დროზე დადება, ან ნებისმიერი სხვა რამ, რაც მე შემიძლია, ჩემი კლინიკა მზად არის მიიღოს ასეთი პაციენტები, რა თქმა უნდა, რიგის გარეშე და უსასყიდლოდ".

2. უფასო საადვოკატო მომსახურება

უფასო იურიდიული დახმარება აქციის მონაწილეებს სამოქალაქო საპეციალიზაციის ადვოკატმა, რაულ აგიკიანმა შესთავაზა:

"წუხანდელი მოვლენების შედეგად დაზარალებულ ადამიანებს ვთავაზობ სრულიად უფასო იურიდიულ მომსახურებას! პ.ს. ჩემი სპეციალიზაციიდან გამომდინარე (სამოქალაქო) შემიძლია მხოლოდ ამ მიმართულებით დახმარება (ზიანის ანაზღაურება, მკურნალობის ხარჯები და ა.შ.)"

უფასო საადვოკატო მომსახურება ამჯერად გირჩსაც შესთავაზეს. ამის შესახებ, პარტიის წარმომადგენელმა, იაგო ხვიჩიამ დაწერა ფეისბუქზე.

3. უფასო სამედიცინო დახმარება სტუდენტებისგან

სამედიცინოს სტუდენტები აქციის მონაწილეებს პირველად დახმარებას გაუწევენ. ქაშუეთთან სამოქალაქო სოლიდარობისთვის 50-60 ექიმი შეიკრიბა.

20 ივნისის აქცია და მისი შედეგები

20 ივნისს მოქალაქეების პროტესტი საქართველოში რუსი დეპუტატების ჩამოსვლას მოჰყვა. პარლამენტის წინ აქციის დაშლის დროს 240 ადამიანი დაშავდა, მათგან 80 სამართალდამცავია, 10-ზე მეტი კი ჟურნალისტი. ჯანდაცვის სამინისტროს თქმით, ამ დრომდე კლინიკაში 102 პაციენტი რჩება. ერთის მდგომარეობა მძიმეა, ორს კი თვალი ამოაჭრეს.

მართლმადიდებლობის საპარლამენტთაშორისო ასამბლეის ფარგლებში, საქართველოში, სხვა ქვეყნების დელეგაციასთან ერთად, რუსეთის დუმის სამი დეპუტატი ჩამოვიდა.

ასამბლეის წაყვანის დროს, რუსი პოლიტიკოსი სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა.

ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს. საბოლოოდ ასამბლეის სესია შეწყდა და რუსმა დეპუტატებმა ქვეყანა დატოვეს.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს, დღის ბოლოს კი პარლამენტის წინ შეიკრიბნენ. ოპოზიციის წევრები ირაკლი კობახიძის, ვახტანგ გომელაურისა და გიორგი გახარიას გადადგომას ითხოვდნენ. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. დაშავებულია ათეულობით მოქალაქე, ორს თვალი აქვს დაკარგული. დაკავებულია 305 ადამიანი. მოვლენების მეორე დღეს, პარლამენტის თავჯდომარე ირაკლი კობახიძე გადადგა, ხოლო ზაქარია ქუცნაშვილმა პარლამენტის მანდატი დატოვა.