რუსეთის პრეზიდენტმა ვლადიმერ პუტინმა გუშინ, 20 ივნისს თბილისში განვითარებული მოვლენები რუსეთის უშიშროების საბჭოს სხდომაზე განიხილა. ინფორმაციას ამის შესახებ რუსული ინტერნეტ გამოცემა взгляд.ру ავრცელებს.

კრემლის წარმომადგენლის თქმით, "ექსტრემისტული ელემენტების მხრიდან გამოწვეული რუსოფობიური პროვოკაცია" უკიდურესად სახიფათო გამოვლინებად შეფასდა. ამასთანავე, ვლადიმერ პუტინის პრესსპიკერის, დიმიტრი პესკოვის თქმით, რუსეთის საგარეო საქმეთა სამინისტროს გადაეცა რეკომენდაცია, გააფრთხილონ საქართველოში მყოფი ან საქართველოსკენ მიმავალი რუსეთის მოქალაქეები შესაძლო საფრთხის შესახებ, რომელიც ექსტრემისტული დაჯგუფებებისგან მომდინარეობს.

გამოცემის ინფორმაციით, სხდომაზე განიხილეს სპარსეთის ყურეში მიმდინარე მოვლენები და შიდა რუსული საკითხები.

დღეს, 21 ივნისს დილის საათებში თბილისში განვითარებულ მოვლენებს გამოეხმაურა ვლადიმერ პუტინის პრესსპიკერი დიმიტრი პესკოვიც. პესკოვმა მომხდარი რუსოფობიურ პროვოკაციად შეაფასა.

"ყველაფერი, რაც გუშინ თბილისში ხდებოდა არის რუსოფობიური პროვოკაცია. აგრესიული გამოვლინებები რუსეთის მოქალაქეების მიმართ ჩვენს უკიდურეს აღშფოთებას იწვევს", — განაცხადა დიმიტრი პესკოვმა.

პესკოვის თქმით, რუსეთის ხელისუფლება, ასევე, შეწუხებულია საქართველოში მყოფი რუსეთის მოქალაქეების უსაფრთხოების საკითხით. მისი თქმით ეს უკიდურესად სერიოზული საკითხია.

დილით ჟურნალისტებთან საუბარში რუსული მხარის გამოძიების პროცესში ჩართვა მოითხოვა სერგეი გავრივოლმაც.

20 ივნისის აქცია

პარლამენტის წინ აქციის დაშლის დროს 240 ადამიანი დაშავდა, მათგან 80 სამართალდამცავია. ჯანდაცვის სამინისტროს თქმით, ამ დრომდე კლინიკაში 102 პაციენტი რჩება. ერთის მდგომარეობა მძიმეა, ორს კი თვალი ამოაჭრეს.

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.

სამართალდამცავებმა მოქალაქეების წინააღმდეგ რეზინის ტყვიები, ცრემლსადენი გაზი და წყლის ჭავლი გამოიყენეს. დაშავებულია ათეულობით მოქალაქე, ორს თვალი აქვს დაკარგული. დაკავებულების ზუსტი რაოდენობა უცნობია.