საქართველოს მართლმადიდებელი ეკლესიის საპატრიარქო რომის პაპის ვიზიტის შესახებ განცხადებას ავრცელებს. საპატრიარქო ყველას სიმშვიდისკენ მოუწოდებს და "ზოგიერთი სასულიერო პირის მიერ საჯარო სივრცეში დაფიქსირებულ მკვეთრად უარყოფით განცხადებებს" მიუღებლად აფასებს.

საპატრიარქოს განცხადებით, საეკლესიო სამართლის მიხედვით, ისინი და მართლმადიდებელი მორწმუნეები რომის პაპის მიერ ჩატარებულ მესაში მონაწილეობას არ მიიღებენ.

საპატრიარქოს განცხადებას უცვლელად გთავაზობთ:

როგორც ცნობილია, საქართველოს პრეზიდენტის და სრულიად საქართველოს კათოლიკოს-პატრიარქის მოწვევით ა.წ. 30 სექტემბერს ჩვენს ქვეყანას ესტუმრება მისი უწმინდესობა, რომის პაპი ფრანცისკე I თანმხლებ პირებთან ერთად. საქართველოს საპატრიარქო პატივისცემით მიესალმება სტუმარს და იმედოვნებს, რომ მისი ჩამოსვლა ხელს შეუწყობს მრავალმხრივი ურთიერთობების გაღრმავებას და რეგიონში მშვიდობის განმტკიცებას.

ამასთან, ვაცხადებთ, რომ ყოვლად მიუღებლად მიგვაჩნია ამ ოფიციალურ ვიზიტთან დაკავშირებთ საქართველოს მართლმადიდებელი ეკლესიის ზოგიერთი სასულიერო პირის მიერ საჯარო სივრცეში დაფიქსირებული მკვეთრად უარყოფითი განცხადებები და მათაც და საერთოდ ყველას მოვუწოდებთ სიმშვიდისაკენ.

შევნიშნავთ იმასაც, რომ ჩვენს და რომის კათოლიკურ ეკლესიას შორის შუა საუკუნეებიდან შეწყვეტილია ლოცვით-ევქარისტიული კავშირი; და ვიდრე არსებობს დოგმატური სხვაობები, საეკლესიო სამართლის მიხედვით, მართლმადიდებელი მორწმუნეები არ იღებენ მონაწილეობას მათ მსახურებაში.

ბუნებრივია, პაპი მესას კათოლიკებისათვის ატარებს და ეს არ შეიძლება ჩაითვალოს პროზელიტიზმის გამოვლინებად, როგორც ამას ზოგიერთები მიიჩნევენ.

საქართველოში რომის პაპი ფრანცისკე 30 სექტემბერს ჩამოდის. პაპის ვიზიტს ეწინააღმდეგება მართლმადიდებელი მშობელთა კავშირი. მღვდელი დავით ისაკაძე და დეკანოზი შიო პაიჭაძე რომის პაპის ვიზიტს დისკრიმინაციული განცხადებით გამოეხმაურნენ.