მართლმადიდებელ მშობელთა კავშირი რომის პაპის ვიზიტის გამო პროტესტის გამოხატვას მომავალშიც აპირებს. მღვდელი დავით ისაკაძე On.ge-სთან საუბრისას ამბობს, რომ პაპის ვიზიტი მათთვის მიუღებელია და საპროტესტო აქციებს აანონსებს:

"პაპს ექნება ძალიან დიდი წინააღმდეგობა ჩვენგან და სჯობს, ეს გაითვალისწინოს. იქნება საპროტესტო აქციები, საპროტესტო მშვიდობიანი აქციები."

ისაკაძე საპატრიარქოს პოზიციას არ იზიარებს და ამბობს, რომ პაპის ვიზიტი პრეზიდენტის ინიციატივა იყო, რომელმაც თავის მხრივ საპატრიარქოზე ზეწოლა განახორციელა:

"პაპი მოიწვია პრეზიდენტმა და შემდეგ საპატრიარქოზე განხორციელდა პრეზიდენტის აპარატის ზეწოლა. პატრიარქის სურვილი პაპის ჩამოსვლა სულაც არ ყოფილა, ეს იყო პრეზიდენტის ინიცირებული. ამ პიროვნების, რომლისთვისაც მართლმადიდებლობა, კათოლიციზმი თუ პროტესტანტიზმი სულერთია. ნუ გამართავს მესას სტადიონზე, მათ აქვთ თავისი ტაძარი. შევიდეს და იქ ჩაატაროს მესა. ნუ ეცდება გადაბირებას ჩვენი მოსახლეობის. ჩვენთვის მიუღებელია მისი სამოციქულოდ, საქადაგებლად ჩამოსვლა."

ისაკაძის თქმით, რომის პაპის საქართველოში ჩამოსვლის მიზანი მართლმადიდებელი მოსახლეობის კათოლიკურ სარწმუნოებაზე მოქცევაა. ვატიკანის მატერიალური რესურსს კი პაპი კათოლიციზმის პროპაგანდაში გამოიყენებს:

"პაპი როგორც პოლიტიკური მოღვაწე, არსად არ ჩადის, ჩადის როგორც რელიგიური მოღვაწე. ჩამოდის სამოციქულო მისიით, ანუ საქადაგებლად. პაპმა სჯობს იქადაგოს ვატიკანში და ჩვენ თავი დაგვანებოს. პაპის ვიზიტს თან მოჰყვება ქართველი მართლმადიდებელი სტუდენტების გაგზავნა ვატიკანში სასწავლებლად. მათ აქვთ ძალიან დიდი ფინანსური საშუალებები, აქედან გამომდინარე ისინი დაეხმარებიან მოხუცებულთა და უპატრონოთა სახლებს. მისი ვიზიტის მთავარი მიზანი არის მართლმადიდებელი მოსახლეობის გადაბირება კათოლიკურ სარწმუნოებაზე."

რომის პაპის ვიზიტი საქართველოში 30 სექტემბერსაა დაგეგმილი. პაპის ვიზიტის წინააღმდეგ დავით ისაკაძემ და მისმა მომხრეებმა დღეს თბილისში, ვატიკანის საელჩოსთან, ლოცვითი აქციაც გამართეს.

მართლმადიდებელ მშობელთა კავშირი წლებია გამოირჩევა თავისი ქსენოფობიური და ჰომოფობიური განწყობებით, მათ სხვადასხვა ტიპის უმცირესობის მიმართ არაერთხელ გამოუხატავთ აგრესიული დამოკიდებულება.

განახლება: On.ge დღის განმავლობაში არაერთხელ შეეცადა, მართლმადიდებელ მშობელთა კავშირის საპროტესტო აქციასთან დაკავშირებით მოეპოვებინა განმარტება საქართველოს მართლმადიდებელი ეკლესიის საპატრიარქოს მხრიდან, თუმცა, ეს ვერ მოხერხდა.