შინაგან საქმეთა სამინისტრომ, სამსახურებრივი მოვალეობის არაჯეროვნად შესრულების ბრალდებით, რომელმაც ადამიანის სიცოცხლის მოსპობა გამოიწვია, ექიმი დააკავა. ბრალდება 5 წლამდე ვადით თავისუფლების აღკვეთას ითვალისწინებს.

გამოძიების ცნობით, მიმდინარე წლის 9 თებერვალს, ფსიქიკური ჯანმრთელობისა და ნარკომანიის პრევენციის ცენტრს სამედიცინო დახმარებისთვის მიმართეს მოქალაქის, შემდგომ ბრალდებულის ნათესავებმა. მათ ექიმს პაციენტის ფსიქიატრიული გამოკვლევა და სტაციონარში მოთავსება სთხოვეს.

"ექიმმა არ გაუწია შესაბამისი დახმარება, რის შემდეგაც პირმა სამედიცინო დაწესებულება დატოვა. მეორე დღეს მან დანით სასიკვდილო ჭრილობები მიაყენა 12 წლის ძმისშვილს, რომელიც გარდაიცვალა", — ნათქვამია შსს-ს განცხადებაში.

შსს-ს ცნობით, საქმეზე ჩატარებული ფსიქიატრიული ექსპერტიზის შედეგად დადგინდა, რომ ბრალდებულს აღენიშნებოდა ფსიქიკური აშლილობა — ეპილეფსიური ფსიქოზი და არსებობდა რისკი, რომ მას მიეყენებინა ზიანი როგორც საკუთარი თავისათვის, ასევე
სხვისთვის.

გამოძიება მიმდინარეობს საქართველოს სისხლის სამართლის კოდექსის 220-ე პრიმა მუხლის მე-2 ნაწილით, სამსახურებრივი მოვალეობის არაჯეროვნად შესრულების ფაქტზე, რამაც ადამიანის სიცოცხლის მოსპობა გამოიწვია.