საგარეო საქმეთა მინისტრმა, დავით ზალკალიანმა ჟურნალისტის კითხვაზე, არის თუ არა საქართველოს საგარეო კურსთან შესაბამისობაში ლევან ვასაძის განცხადება, რომ ითანამშრომლოს რუსეთთან, ოკუპირებული ტერიტორიების დაბრუნების შემთხვევაში, უპასუხა, რომ ეს აბსოლუტურად არაა საგარეო პრიორიტეტებთან თანხვედრაში. ასევე, კითხვაზე, როგორ შეაფასებდა ვასაძის მუქარას ელჩების მიმართ, მინისტრმა უპასუხა, რომ საქართველოს რაც შეიძლება მეტი თანადგომა სჭირდება პარტნიორებისგან.

"ჩვენ ვცხოვრობთ ურთულესი გეოპოლიტიკური პროცესების ფონზე და ეს პირველ რიგში გავლენას ახდენს საქართველოზე. ასეთ სიტუაციაში ჩვენ გვჭირდება მეტი მოკავშირე და მეტი თანამოაზრე. აქედან გამომდინარე, ჩვენი სტრატეგიული პარტნიორებისგან: აშშ-სგან, ევროკავშირისგან, ჩვენს მეზობლებისგან, როგორც არასდროს ისე გვჭირდება თანადგომა. ამ უსერიოზულეს გამოწვევებს, რომელიც დღეს ჩვენს წინაშეა, ისეთი როგორიცაა ოკუპაცია, ჩვენ მათი დახმარების გარეშე ვერ გავუმკლავდებით", — განაცხადა ზალკალიანმა.

16 ივნისს ლევან ვასაძე თავის ორგანიზებულ "ნამდვილი კაცების" აქციაზე დაემუქრა ელჩს, თუმცა არ დაუკონკრეტებია რომელს). ბიზნესმენი ღია ტრიბუნიდან, სამართალდამცავების გარემოცვაში მხარდამჭერებს ძალადობისკენ მოუწოდებდა.

"ის ტუტუცი, უცხოელი ელჩი, რომელსაც არ ესმის, რომ მისი საქმე არის საელჩოში ჯდომა და ელჩობა, რომელიც გამოდის ქუჩაში და გვასწავლის ჭკუას, ესხმის თავს ჩვენი სახელმწიფოს წარმომადგენლებს და ჩვენი ეკლესიის ხელმძღვანელობას უშრობს სისხლს, ის აღარ არის ელჩი, თუ უნდა, რომ ხელები შევუკრათ თავის დაცვიანად, არც ეგ არის პრობლემა და მივაბრძანებთ თავის საელჩოში", — იმუქრებოდა ის.

მანვე განაცხადა, რომ სურს "ძმაკაცობა" ევროპასთან და ამერიკასთან, მაგრამ ოკუპირებული ტერიტორიების დაბრუნების შემთხვევაში უნდა "ძმაკაცობა რუსეთთანაც".