საქართველოს პრემიერ-მინისტრი, მამუკა ბახტაძე დალასის საპატიო მოქალაქე გახდა. მას დალასის საპატიო მოქალაქის წოდება დალასის მსოფლიო ურთიერთობათა საბჭოსთან შეხვედრაზე სიტყვით გამოსვლის შემდეგ ქალაქის მერის, მაიკ როულინგსის სახელით მიანიჭეს. ინფორმაციას მთავრობის ადმინისტრაცია ავრცელებს.

მათი ცნობით, მამუკა ბახტაძემ შეხვედრაზე სიტყვით გამოსვლისას დამოუკიდებლობის აღდგენიდან დღემდე საქართველოს მიღწევებზე ისაუბრა და აღნიშნა, რომ განსაკუთრებული გარდაქმნა ბოლო წლების განმავლობაში განხორციელდა.

დალასამდე პრემიერი 6 მაისს ხონის საპატიო მოქალაქედ აირჩიეს. ქალაქში სახალხო დღესასწაული გაიმართა, რომელსაც თავად ბახტაძე დაესწრო. დღესასწაულზე სიტყვით გამოსვლისას ბახტაძე ადგილობრივებს დაპირდა, რომ ხონი საქართველოს ყველაზე წარმატებული და ენერგიით სავსე ქალაქი იქნება.