ABC-ის პოპულარული კომედიური სერიალის თანამედროვე ოჯახის შემქმნელებმა დააანონსეს, რომ მათ სამსახიობო ანსამბლს 8 წლის ტრანსგენდერი მსახიობი ჯექსონ მილარკერი შეუერთდება.

ჯექსონის დებიუტი სერიალში 28 სექტემბერს შედგება, ეპიზოდში, რომელის სახელწოდებაც სტერეოტიპების დღე იქნება.

რაიან ქეისი, რომელიც ახალი ეპიზოდის რეჟისორია, მოხარულია, რომ მათ გუნდს 8 წლის მსახიობი შეუერთდა და საკუთარ ინსტაგრამზე წერს - "ეს ჯექსონ მილარკერია, 8 წლის, ატლანტიდან, ის ტრანსგენდერია. ის ამ კვირაში ლილის მეგობარ ტომს თამაშობს თანამედრვე ოჯახში და ნამდვილად არაჩვეულებრივია. ეს არის ერთ-ერთი მთავარი მიზეზი, თუ რატომ მიყვარს ეს შოუ".

თანამდროვე ოჯახი 2009 წელს დაიწყო და ემის ნომინანტი 77-ჯერ გახდა. აქედან 22 აიღო კიდეც.

ტრანსგენდერი პერსონაჟები ამერიკულ კინემატოგრაფში არც თუ ისე ხშირად გვხვდება, წლევანდელ Emmy-ზე, სერიალ Transparent-ის ვარსკვლავმა ჯეფრი ტემბორმა, ჯილდოს მიღების სამადლობელ სიტყვაში აღნიშნა, რომ ტელე და კინო პროდიუსერებმა უფრო მეტი ტრანსგენდერი ადამიანი უნდა დაასაქმონ შოუ-ბიზნესში და მისცენ მათ როლები.

"იმედი მაქვს, რომ მე ბოლო მამაკაცი ვარ, რომელიც ტრანსგენდერი ქალის როლს თამაშობს და შემდგომში, ასეთ როლებზე, ტრანსგენდერ ადამიანებს დაამტკიცებენ", განაცხადა ტემბორმა.

ტრანსგენდერი პერსონაჟი გამოჩნდა პოპულარული ქართული სერიალის ჩემი ცოლის დაქალების მეათე სეზონშიც.