საქართველოს პარლამენტის თავმჯდომარის, ირაკლი კობახიძის თქმით, ოპოზიციის კანონპროექტს მაჟორიტარული სისტემის გაუქმების შესახებ, პარლამენტი განიხილავს, რადგან ამის ვალდებულება აქვთ. საქმე ეხება 20 ოპოზიციური პარტიის მოთხოვნას შევიდეს ცვლილება კონსტიტუციაში და 2020 წლის არჩევნები პროპორციული წესით ჩატარდეს. პარტიებმა 300 ათასზე მეტი ხელმოწერა შეაგროვეს, რაც საკონსტიტუციო ცვლილებების განხორციელებისთვისაა საჭირო და პარლამენტს მიმართეს.

ირაკლი კობახიძის თქმით, პარლამენტს კანონის დონეზე აქვს ვალდებულება გაეცნოს ოპოზიციის მიერ მომზადებულ კანონპროექტს, რომელსაც 300 000-ზე მეტი ხელმოწერა ახლავს. მას განმარტა, რომ საკითხი საარჩევნო ცვლილებებთან დაკავშირებით შექმნილ სამუშაო ჯგუფში არ განიხილება.

"როცა გროვდება ხელმოწერები, პარლამენტი არა მხოლოდ პასუხისმგებელია, არამედ ვალდებულია, განიხილოს", — განაცხადა ირაკლი კობახიძემ.

მისი თქმით, ოპოზიციას ახალი დღის წესრიგის შექმნას ცდილობს წაგებული არჩევნების შემდეგ. მისივე განმარტებით, საპარლამენტო უმრავლესობა აზრს არ შეიცვლის და პროპორციულ სისტემაზე 2024 წლიდან გადავლენ.

"ოპოზიციას პოლიტიკური დღის წესრიგის შექმნა უნდა და წაგებული არჩევნების შემდეგ აქვს კრიზისი. ამ კრიზისის დაძლევისთვის საკუთარი დღის წესრიგის შექმნა სჭირდებათ და ამის კარგი საშუალება ახალი თემის წინ წამოწევაა", — განაცხადა ირაკლი კობახიძემ.

მისი თქმით, ოპოზიციას ორჯერ შესთავაზეს პროპორციულ საარჩევნო სისტემაზე 2020 წლიდან გადასვლა, თუმცა უარი მიიღეს.

"ორჯერ შესთავაზა ქართულმა ოცნებამ ოპოზიციას 2020 წლისთვის ამ სისტემის ამოქმედება. მაშინ, 2016 წლამდე, პარლამენტის თავმჯდომარე იყო დავით უსუფაშვილი. მან გააჟღერა წინადადება, რომ 2016 წლის არჩევნები ჩატარებულიყო შერეული სისტემით და 2020 წლის არჩევნები პროპორციული სისტემით, რაზეც ოპოზიციამ უარი თქვა. როცა საკონსტიტუციო კომისიამ დაასრულა მუშაობა 2020 წლიდან შევთავაზეთ ოპოზიციას პროპორციული სისტემის ამოქმედება. საბაბი სჭირდებოდათ, რომ საკონსტიტუციო რეფორმისთვის მხარი არ დაეჭირათ", — განაცხადა ირაკლი კობახიძემ.

მისი თქმით, საკონსტიტუციო ჩანაწერი, რომ 2020 წლის არჩევნები ჩატარდება მაჟორიტარული წესით და ყველა მომდევნო პროპორციულით "იდეალურიც კია". ის იმედს იტოვებს, რომ 2024 წლისთვის დემოკრატიული და პოლიტიკური კულტურა გაიზრდება და მზად იქნებიან პროპორციული საარჩევნო სისტემისთვის.