საარჩევნო სისტემის შეცვლის მოთხოვნით ოპოზიციამ დღეს, 13 ივნისს პარლამენტში 300 ათასი ხელმოწერა შეიტანა. ისინი სრულად პროპორციულ სისტემაზე გადასვლას არა 2024 წლისთვის, არამედ 2020 წლის არჩევნებისთვის ითხოვენ. კონსტიტუციაში ცვლილების შეტანისთვის 200 ათასი ხელმოწერა არის საჭირო.

"2020-ში უნდა ჩატარდეს სამართლიანი არჩევნები ჩვენს ქვეყანაში, თუ ჩვენ გვსურს, რომ შევინარჩუნოთ ჩვენი სტრატეგიული ევროატლანტიკური არჩევანი. ეს არის ჩვენი პარტნიორების მოლოდინი, ამისთვის ყველაზე მნიშვნელოვანი ცვლილება, რაც უნდა განხორციელდეს, ეს არის საარჩევნო სისტემის შეცვლა და სრულად გადასვლა პროპორციულ საარჩევნო სისტემაზე", — განაცხადა რუსთავი 2-თან ნაციონალური მოძრაობის წევრმა, თინა ბოკუჩავამ.

თავისუფალი დემოკრატების წევრმა, ალექსანდრე ბარამიძემ განაცხადა, რომ შერეული სისტემა ელექტორატში ძილთა განაწილებას ადეკვატურად არ ასახავს.

"2 დღის წინ შეერთებული შტატების სახელმწიფო მდივანმა ძალზე მკაცრი რამდენიმე მესიჯი გამოუგზავნა საქართველოს ხელისუფლებას, მათ შორის თავისუფალი და სამართლიანი არჩევნების ჩატარებასთან დაკავშირებით", — განაცხადა ბარამიძემ.

ამავე დროს, პარლამენტში საარჩევნო კანონმდებლობის რეფორმასთან დაკავშირებით სამუშაო ჯგუფის პირველი შეხვედრა იმართება. შეხვედრის დაწყების წინ ოპოზიციამ კიდევ ერთხელ განაცხადა, რომ 2020 წელს არჩევნები პროპორციული სისტემით უნდა ჩატარდეს. ევროპულმა საქართველომ შეხვედრა უკვე დატოვა.

შეხვედრის გამართვამდე ორი დღით ადრე, აშშ-ს სახელმწიფო მდივანმა, მაიკ პომპეომ პრემიერ-მინისტრ, მამუკა ბახტაძესთან შეხვედრისას სასამართლო სისტემაზე, სამართლიან არჩევნებსა და ანაკლიის პორტზე გაამახვილა ყურადღება. როგორც სახელმწიფო მდივანმა აღნიშნა, მან მოუწოდა საქართველოს, რომ თავისუფალი და დემოკრატიული არჩევნები უზრუნველყოს. პომპეოს განცხადებას გამოეხმაურა პარლამენტის თავმჯდომარე, ირაკლი კობახიძე და აღნიშნა, რომ მის რეკომენდაციებს გაითვალისწინებენ და სამუშაო ჯგუფის ფორმატში იმსჯელებენ.