დიდი, პატარა ტყუილები ეკრანზე წარმატებით დაბრუნდა. მეორე სეზონის პრემიერამ HBO-ს სხვადასხვა სტრიმინგ არხებზე 2,5 მილიონი მაყურებელი მოაგროვა. რაც პირველი სეზონის მაყურებელთა რაოდენობაზე (1,8 მლნ) 34%-ით მეტია. გასათვალისწინებელია ის ფაქტიც, რომ სერიალს ოსკაროსანი მსახიობი, მერილ სტრიპი შეუერთდა.

კრიტიკოსები ახალ სეზონს ერთხმად აქებენ, Rotten Tomatoes-ზე კი სეზონის რეიტინგი 99%-ს შეადგენს. Variety-ზე გამოქვეყნებულ მიმოხილვაში კაროლინა ფრამკე წერს

იმის მიუხედავად, რომ მეორე სეზონში არეულობაა, ეს ყველაფერი უფრო კარგ წარმოდგენას ქმნის. უფრო იოლი იქნებოდა, ამბის იმ სანაპიროზე დატოვება ფინალში, ტრიუმფით. თუმცა, უფრო რთული და საინტერესოა წარმოიდგინო, რა ხდება შემდეგ დღეს, იმის შემდეგ დღეს და ა.შ.

პირველმა სეზონმა 2017 წელს ემის რვა ჯილდოს მოგება შეძლო. გაიმარჯვა ლიმიტირებული სერიალის კატეგორიაში და მსახიობებმა - ნიკოლ კიდმანმა, ლორა დერნმა და ალექსანდრე სკარსგარდმა საუკეთესო პერფორმანსისთვის ჯილდოები დაიმსახურეს.