სსრკ-ს ყოფილი პრეზიდენტის, მიხეილ გორბაჩოვის თქმით, HBO-ს სერიალი ჩერნობილი არ უნახავს. ამის შესახებ მან რადიოსადგურ გოვორიტ მოსკავს განუცხადა. გარდა ამისა, ის უარყოფს, რომ ქიმიკოს ვალერი ლეგასოვის კარიერის განვითარებას ხელი შეუშალა.

სერიალის სიუჟეტის მიხედვით, ჩერნობილის სალიკვიდაციო სამუშაოების საბჭოს წევრისა და ქიმიკოსის ვალერი ლეგასოვის კარიერა მაშინ დასრულდა, როდესაც 1986 წელს მან კატასტროფის შესახებ თავისი ვერსია მოყვა და რამდენიმე საიდუმლო ინფორმაცია ვენაში, საერთაშორისო კონფერენციაზე გააჟღერა. ზოგიერთი მეცნიერისა და ისტორიკოსის აზრით, მიხეილ გორბაჩოვმა პირადად გასცა ბრძანება, რომ ვალერი ლეგასოვისთვის სოციალისტური შრომის გმირის წოდება არ მიენიჭებინათ. გორბაჩოვის თქმით, მსგავსი ბრძანება მას არ გაუცია:

"მე არ გამიცია ბრძანება. და ჩემ გარდა ვინ გასცემს? ეს გამოგონილია".

მისივე თქმით, მკურნალობის გამო სერიალის ნახვა ჯერ ვერ მოასწრო. გორბაჩოვი საავადმყოფოში რამდენიმე კვირის წინ მოხვდა:

"დამპირდნენ, რომ ჩვენებას საავადმყოფოში მომიწყობდნენ".

ჩერნობილის 1986 წლის კატასტროფაზე გადაღებულმა HBO-ს მინი-სერიალმა ჩერნობილმა დიდი მოწონება დაიმსახურა. IMDb-ზე ის ყველაზე რეიტინგული შოუა. სერილი უკრაინის ქალაქ პრიპიატში მომხდარ ბირთვულ კატასტროფაზე გვიყვება, რომელიც ჩერნობილის ატომური ელექტროსადგურის მეოთხე ბლოკის აფეთქებას მოჰყვა. ბირთვული აფეთქების შედეგად რეაქტორი მთლიანად დაინგრა, რამაც მისი მიმდებარე ვრცელი ტერიტორიის რადიოაქტიური დაბინძურება გამოიწვია. ის შეფასებულია, როგორც უდიდესი ავარია ატომური ენერგეტიკის ისტორიაში, როგორც დაღუპულთა და მისგან დაშავებულ ადამიანთა რაოდენობით, ისე ეკოლოგიური დაბინძურებითა და ეკონომიკური ზიანით.

სერიალმა დიდი ვნებათაღელვა გამოიწვია რუსეთში. პროსახელისუფლებო მედია სერიალის შემქმნელებს ფაქტების დამახინჯებაში ადანაშაულებს. NTV კი ჩერნობილის საკუთარ ვერსიას ამზადებს, რომელშიც დამნაშავეს უცხოელ ჯაშუშებს შორის ეძებენ.

ამავე თემაზე: