რუსული სახელისუფლებო მედია HBO-ს სერიალის, ჩერნობილს წინააღმდეგ გამოდის და შემქმნელებს აკრიტიკებს. ისტორიული დრამა 1986 წლის ჩერნობილის კატასტროფის შესახებ მოგვითხრობს და ხელისუფლების არასწორი და დაგვიანებული რეაქციის შესახებ გვიყვება, რამაც ათასობით ადამიანის სიცოცხლე შეიწირა.

Russia 24-ის ჟურნალისტი სტანისლავ ნატანზონი გადაცემა ვესტიში ყვება, როგორ "დაამახინჯეს" სცენარისტებმა ისტორია. ნატანზონი აკრიტიკებს HBO-ს იმის გამო, რომ იმ დროისთვის დამახასიათებელი აივნებისა და ფანჯრების ნაცვლად, სერიალში მეტალო-პლასტმასის კარ-ფანჯრები ჩანს.

ის უკმაყოფილებას გამოხატავს იმის გამო, რომ რამდენიმე პერსონაჟი "ცუდ ტიპად" არის გამოყვანილი, მათ შორის ატომური სადგურის მთავარი ინჟინერი, ანატოლი დიატლოვი.

"საერთოდ, ბარემ ყველა ჩაცხრილონ ან იქნებ გულაგში გააგზავნონ? ან უკეთესი — გააგზავნონ გულაგში და იქ ჩაცხრილონ. დასავლელი მაყურებლებისთვის ასე ყველაფერი ცხადი გახდება, მათ უბრალოდ დათვი და გარმონი აკლიათ. ნუთუ ჯდება HBO-ს კონცეფციაში ის, რომ საბჭოთა კავშირში ადამიანებზე ზრუნვას ცდილობდნენ? საქმე არა სისხლიან რეჟიმში არამედ იმაშია, რომ ასეთი ავარია მსოფლიოში ჯერ არასდროს ყოფილა და მთელი მსოფლიო, მათ შორის საბჭოთა კავშირი ამისთვის მზად არ იყო. როგორც იაპონიის ფუკუსიმა გვიჩვენებს, ჯერ კიდევ არ არის მზად", — ამბობს სტანისლავ ნატანზონი.

გარდა ამისა, ის არ ეთანხმება მოსაზრებას, რომ KGB-ს თანამშრომლები ლეგასოვზე ზეწოლას ახდენდნენ. ჟურნალისტი ტყუილს უწოდებდა სერიალში ნაჩვენებ და ისტორიულად ცნობილ ფაქტს, რომ აკადემიკოს ვალერი ლეგასოვს ჩერნობილის ტრაგედიაზე საუბრისა და წერის უფლებას არ აძლევდნენ. ნატანზონი ამტკიცებს, რომ ლეგასოვმა სტატია "ჩემი ვალია, ამის შესახებ მოგიყვეთ..." პრავდაში, ქვეყნის მთავარ გამოცემაში ჯერ კიდევ თვითმკვლელობამდე გამოაქვეყნა.

"სიმართლის მამხილებელმა" ჟურნალისტმა ლეგასოვის ისტორიის მოყოლისას ფაქტობრივი შეცდომა დაუშვა. Facebook-ის ერთ-ერთმა მომხმარებელმა და ჟურნალისტმა, ილია შეპელინმა დაპოსტა, რომ სტანისლავ ნატანზონი პირდაპირ ეთერში ტყუილს ავრცელებდა. რეალურად, ლეგასოვის სტატია თვითმკვლელობიდან ორ კვირაში, 1988 წელს გამოქვეყნდა. პოსტის კომენტარებში როსია 24-ის ჟურნალისტმა შეცდომა აღიარა, თუმცა თქვა, რომ ეს ისტორიას მაინც არ ცვლის:

"სიმართლე რომ გითხრა, ამ სტატიის შესახებ ვიღაცის ძველი რეპორტაჟიდან გავიგე და არ გადავამოწმე... როდესაც ამის შესახებ კიდევ რამეს გავაკეთებ, ბოდიშსაც მოვიხდი... მაგრამ მთლიან ისტორიას ეს მაინც არ ცვლის. ანუ კი, საბჭოთა კავშირი ავარიის შესახებ თავის ხალხს ატყუებდა, მაგრამ ბოროტ KGB-ს ლეგასოვი თვითმკვლელობამდე არ მიუყვანია. ამის არც ერთი ფაქტობრივი დადასტურება არ არსებობს", — დაწერა ჟურნალისტმა.

ამავე თემაზე: