ოცნების დეპუტატი არჩილ გორდულაძე ექსპრემიერ ირაკლი ღარიბაშვილის მიერ ციხიდან 29 სექტემბერს გამოგზავნილ რიგით მე-8 წერილს ეხმაურება. ის ღარიბაშვილის განცხადებას აკრიტიკებს და ამბობს, რომ მთავარი კითხვა, რომელსაც ყოფილ პრემიერს პასუხი აქვს გასაცემი, მის საცხოვრებელში აღმოჩენილი თანხებისა და ნივთების წარმომავლობას ეხება.

"ირაკლი ღარიბაშვილის განცხადება, რომელიც უპირისპირდება ყველას და ყველაფერს ამ ქვეყანაში, ძალიან მძიმეა. არა მხოლოდ იმიტომ, რომ საუბარი არის ჩვენი გუნდის ყოფილ წევრზე და ამავდროულად პატიმარზე... ამ ადამიანს არა მხოლოდ მიხეილ სააკაშვილი ეთანხმება, რომელიც წარსული წერილების მაგალითად ნახეთ, არამედ ახლა პირდაპირ მიხეილ სააკაშვილის გზას დაადგა, რომ თურმე ის ყოფილა ერთადერთი, რომელმაც ყველაფერი გააკეთა ამ ქვეყანაში, თორემ სხვა ადამიანები უბრალოდ არ არსებობენ და არ არსებობს ის ღვაწლი, რაც აქვს ბიძინა ივანიშვილს ამ ქვეყანაში მშვიდობის და ეკონომიკური წინსვლის უზრუნველსაყოფად. ამ დეტალებში უბრალოდ რომ არ შევიდეთ, მთავარი კითხვაა — რაც მას აქვს პასუხი გასაცემი — არის საიდან გაჩნდა ის თანხები და ის ნივთები, რომელიც მისი საცხოვრებლიდან იქნა ამოღებული, საიდან დააგროვა ეს ყველაფერი", — აცხადებს გორდულაძე.

შეგახსენებთ, რომ ექსპრემიერმა ღარიბაშვილმა 29 სექტემბერს ციხიდან რიგით მე-8 წერილი გამოაქვეყნა, რომელშიც 2021 წლის თებერვალში მთავრობის სათავეში დაბრუნების დეტალებს, ქვეყანაში არსებულ მაშინდელ მძიმე კრიზისს და მისი პრემიერობის პერიოდში მიღწეულ შედეგებზე წერს.