შს მინისტრმა გიორგი გახარიამ თბილისი პრაიდთან დაკავშირებით თქვა, რომ შსს-მ უნდა იპოვოს ბალანსი გამოხატვის თავისუფლებასა და მოქალაქის უსაფრთხოებას შორის. ამის შესახებ მან 2 ივნისს გადაცემა იმედი LIVE-ის ეთერში განაცხადა.

"ჩვენ ვიცავთ ბალანსს", — თქვა გახარიამ და აღნიშნა ისიც, რომ პრაიდის ორგანიზატორებს შეუძლიათ სტრასბურგში ჩივილი, რადგან ეს საქართველოს მოქალაქის უფლებაა: "როგორც ვიცავთ გამოხატვის თავისუფლების უფლებას, ისე დავიცავთ ამ უფლებას".

31 მაისს თბილისი პრაიდის ორგანიზატორებმა განაცხადეს, რომ შინაგან საქმეთა სამინისტრომ მათ ღირსების მარშის ჩასატარებლად დახურული სივრცე შესთავაზა. ამ დახურულ სივრცეში კი საკლუბო სცენა ან სტადიონი მოიაზრებოდა. მათი თქმით, უსაფრთხოების ზომებსა და გეგმებზე საუბრის ნაცვლად შსს-ს წარმომადგენლებმა უთხრეს, რომ პრაიდის კვირეულის ღონისძიებების დაცვა შეუძლებელი იქნება.

"ეს დამოკიდებულება გვინდა შევაფასოთ, როგორც ჩვენი სამოქალაქო, საბაზისო და პოლიტიკური უფლებების შელახვა. კერძოდ, შეკრების, მანიფესტაციის და გამოხატვის თავისუფლების შეზღუდვა. ამაზე გვექნება შესაბამისი რეაგირება, ვაპირებთ მივმართოთ სტრასბურგის სასამართლოს", — თქვა ერთ-ერთმა ორგანიზატორმა, მარიამ კვარაცხელიამ.

თბილისში 18-დან 23 ივნისის ჩათვლით LGBTQI პრაიდი დაიგეგმა. კვირეულის ფარგლებში სხვადასხვა სოციალური, კულტურული და პოლიტიკური ღონისძიება დაბოლოს ღირსების მარში გაიმართება.

გაიგეთ მეტი: