საგანგებო სიტუაციების მართვის სამსახურში თბილისში ძლიერი სეტყვის გამო 80-მდე შეტყობინება შევიდა. უწყების ცნობით, შეტყობინებების ნაწილი შენობების სარდაფების, მიწისქვეშა გადასასვლელებისა და მეტროსადგურების ჩასასვლელების დატბორვას ეხებოდა.

"უსაფრთხოების ზომებიდან გამომდინარე მოძრაობა დროებით შეზღუდულია გიორგი მინდელის სახელობის ხიდზე და შეშელიძის ქუჩაზე", — ნათქვამია საგანგებო სიტუაციების მართვის სამსახურის მიერ გავრცელებულ განცხადებაში.

აქვე ვკითხულობთ, რომ ადგილზე ტრანსპორტის მოძრაობას საპატრულო პოლიციის თანამშრომლები არეგულირებენ.

ამ დროისთვის, საპატრულო პოლიციასა და სახანძრო-სამაშველო სამსახურში, დაშავებული მოქალაქეების შესახებ ინფორმაცია არ დაფიქსირებულა.