დღეს წერეთლის გამზირზე მომხდარ თბილისის დინამოსა და ქუთაისის ტორპედოს გულშემატკივრების დაპირისპირების ფაქტზე შინაგან საქმეთა სამინისტროს გამოძიება არ დაუწყია.

როგორც შსს-მ On.ge-ს განუცხადა, ინციდენტი დანაშაულების ნიშნებს არ შეიცავდა.

"იყო მხოლოდ სიტყვიერი კამათი, რომელიც პოლიციამ გაანეიტრალა. არ ყოფილა ფიზიკური დაპირისპირება და სხვა სახის დანაშაულის ნიშნები, ამიტომ პოლიციას არავინ დაუკავებია და არც გამოძიება დაწყებულა" - განუცხადეს On.ge-ს შსს-ში.

ინციდენტი თბილისის დინამოსა და ქუთაისის ტორპედოს მატჩამდე მოხდა, რომელიც უმაღლესი ლიგის მე-7 ტურის ფარგლებში მიმდინარეობდა. შეხვედრა ფრე - 0:0 დასრულდა.