აჭარის მთავრობის თავმჯდომარე თორნიკე რიჟვაძე ამბობს, რომ განათლების მინისტრის, ინგა შამილიშვილის გადაყენების შესახებ გადაწყვეტილება ერთ საათში მიიღო. მან მძიმე ფაქტად შეაფასა, დამოუკიდებლობის დღის მსვლელობაზე რუსული დროშების გამოჩენა და აღნიშნა, რომ ეს დრო საკმარისი იყო და დღესაც იგივე გადაწყვეტილებას მიიღებდა.

რიჟვაძემ ისაუბრა იმაზეც, რომ საზოგადოება შამილიშვილის გადაყენებაში სხვა მიზეზებს ხედავს, რაც არასწორია.

"გარკვეულ კონსპირაციაზე, გარკვეულ ჯაჭვზე და გარკვეულ საბაბზე არის საუბარი ამ კონკრეტული გადაწყვეტილების მისაღებად. კიდევ ერთხელ მინდა ვთქვა შემდეგი: პირველი, რომ მთავრობის თავმჯდომარის ექსკლუზიური პრეროგატივაა, ვინ იმუშავებს მინისტრთა კაბინეტში. ასე რომ, არანაირი წინაღობა, რომ მანამდეც რაიმე ცვლილება გამეხორციელებინა მინისტრთა კაბინეტში, მე არ მქონია", — განაცხადა რიჯვაძემ აჭარის ტელევიზიის ეთერში.

26 მაისს, დამოუკიდებლობის დღისადმი მიძღვნილ ღონისძიებაზე რუსული დროშები გამოჩნდა, რასაც საზოგადოების პროტესტი მოჰყვა. ჯგუფი, რომელიც რუსულ ნაციონალურ სამოსში იყო გამოწყობილი და დროშებით მოძრაობდა აცხადებდა, რომ, უბრალოდ, ღონისძიებაში მონაწილეობენ, საკუთარ კულტურას წარადგენენ და პოლიტიკაში არ ერევიან. მათივე თქმით, რუსეთი ოკუპანტი ქვეყანა არ არის.

მალევე, აჭარის თავმჯდომარემ, თორნიკე რიჟვაძემ განაცხადა, რომ მომხდარის გამო დაითხოვა აჭარის განათლების მინისტრი ინგა შამილიშვილი.

"ოპონენტთა დისკრედიტირების ყბადაღებულ და დღეს უკვე ლამის კლიშედ ქცეულ "ჩრდილოთუმეს" იარლიყზე კომენტარს არც კი გავაკეთებ, ან კი მტკიცებას რა ძალა აქვს? დაე, კვლავ ჩემი ღირებულებები ჩემმა საქმეებმა გამოაჩინოს", — ასე გამოეხმაურა აჭარის შამილიშვილი მისი გადაყენების საკითხს.