შინაგან საქმეთა სამინისტროს განცხადებით, დამოუკიდებლობის დღისადმი მიძღვნილი ღონისძიებების გამო თბილისში ზოგიერთ ქუჩაზე მოძრაობა შეიზღუდება, ზოგგან კი მარშრუტები შეიცვლება.

უწყების განცხადებით, 20 მაისს 24 საათიდან, 21 მაისს დილით 5 საათამდე ავტომანქანების მოძრაობა აიკრძალება თავისუფლების მოედანზე, ასევე, მასთან დამაკავშირებელ ყველა ქუჩაზე: რუსთაველის გამზირზე, შალვა დადიანის, კოტე აფხაზის და ალექსანდრე პუშკინის ქუჩებზე.

ავტომანქანების მოძრაობის მარშრუტები დროებით შეიცვლება 21 მაისის დილის 06:00 საათიდან. კერძოდ, პუშკინის ქუჩიდან ამომავალი ავტომანქანები გიორგი ლეონიძის ქუჩის მიმართულებით მოძრაობის გაგრძელებას ვერ შეძლებენ. ისინი ლეონიძის ქუჩაზე მოსახვედრად იმოძრავებენ მხოლოდ რუსთაველის გამზირის გავლით, წრეზე მობრუნდებიან და კვლავ რუსთაველის გამზირის გავლით ავლენ ლეონიძის ქუჩაზე.

ასევე, შალვა დადიანის და კოტე აფხაზის ქუჩებიდან ამომავალი მანქანები ვერ იმოძრავებენ რუსთაველის გამზირის მიმართულებით. აღნიშნული ქუჩებიდან ამომავალი საავტომობილო ნაკადი პუშკინის ქუჩით ჩავა ბარათაშვილის ქუჩაზე, მობრუნდება და იმოძრავებს რუსთაველის გამზირის მიმართულებით.

აღნიშნული მარშრუტები 26 მაისის ღონისძიებების დასრულებამდე შენარჩუნდება, რის შემდეგაც მოძრაობა ჩვეულ რეჟიმში აღდგება. შსს-ს ცნობით, ყველა ქუჩასა და მოედანზე სატრანსპორტო მოძრაობას საპატრულო პოლიციის ეკიპაჟები დაარეგულირებენ.