სახალხო დამცველი, ნინო ლომჯარია მომღერალ თამარ ჭოხონელიძეს მხარდაჭერას უცხადებს. მომღერალმა გადაცემა რეაქციაში 17 მაისის აქციებსა და მის მიმართა აგრესიაზე ისაუბრა.

"მინდა ჩემი პატივისცემა გამოვხატო ქ-ნი თამრიკო ჭოხონელიძის მიმართ, რომელმაც TV პირველის ეთერში ძალიან სწორი და ჯანსაღი სამოქალაქო პოზიცია დააფიქსირა ადამიანის უფლებების დაცვის მნიშვნელობის, ურთიერთპატივისცემის და შემწყნარებლობის დასაცავად. მინდა ვუთხრა მასაც და მის მდგომარეობაში მყოფ სხვა მოქალაქეებს, რომ ის "სიძულვილი", რასაც, ალბათ, სოციალურ ქსელებში ბოლო პერიოდში აწყდებიან, ძალიან ხელოვნური, გადაჭარბებული და ხშირ შემთხვევაში არარსებულია", — წერს ნინო ლომჯარია ფეისბუქზე.

ომბუდსმენის თქმით, "სიძულვილი და "აგრესია" ხელოვნურად შექმნილი და ორგანიზებულია გარკვეული ჯგუფების მიერ იმისთვის, რომ ადამიანებს, რომლებიც "თავისუფლად და გაბედულად აფიქსირებენ აზრს, დამაშინებელი გარემო შეუქმნან".

"ამიტომ არის ძალიან მნიშვნელოვანი ყველამ თავისუფლად, არააგრესიულად და არგუმენტირებულად გამოხატოს თავისი პოზიცია და ამიტომ ქ-ნი თამრიკოს პოზიციონირება მჯერა, რომ გადამდები იქნება სხვებისთვისაც. საზოგადოებამ უნდა ვთქვათ, რომ ჩვენ არ ვართ ისეთი "პრიმიტიულები", როგორც ზოგიერთ პოპულისტს სურს რომ წარმოგვაჩინოს, ჩვენ არ ვართ ისეთი აგრესიულები, როგორც რამოდენიმე ჯგუფი ცდილობს, რომ სოციალურ ქსელში დახატოს", — აცხადებს ომბუდსმენი.

მომღერალმა თამრიკო ჭოხონელიძემ განაცხადა, რომ მას შემდეგ რაც 17 მაისს, ოჯახის სიწმინდის დღის აღსანიშნავ კონცერტზე გამოსვლაზე უარი თქვა, თავდასხმისა და ბულინგის მსხვერპლი გახდა. გარდა ამისა, მომღერალმა თქვა, რომ სექსუალური ორიენტაციის გამო ადამიანების დისკრიმინაცია მართებული არაა.

"17 მაისი უფრო ადრე გაჟღერდა იმ ხალხის მიერ, ვინც ეს დღე ჰომოფობიასთან ბრძოლის დღედ გამოაცხადა. სექსუალური ნიშნით ადამიანის დისკრიმინაცია არ უნდა იყოს მართებული და ლამაზი. არც უფალს უთქვამს შენ ვინც არ მგოწონს, ჩაქოლეო, მან სხვადასხვანაირი ადამიანები გააჩინა დედამიწაზე", — განაცხადა ჭოხონელიძემ.