არასამთავრობო ორგანიზაცია ILGA Europe-ის მიერ გამოქვეყნებული ინდექსის მიხედვით, 2018 წელს ლგბტი ადამიანების უფლებების დაცვის კუთხით საქართველოს პოზიცია გაუმჯობესდა. მონაცემების მიხედვით, 2018-ში საქართველოს 30 პროცენტი აქვს, 2017 კი 26 პროცენტი ჰქონდა. ამ მონაცემებით, საქართველო 49 ევროპულ ქვეყანას შორის 24-ე ადგილზეა. ინდექსის მიხედვით, რაც უფრო მაღალია პროცენტი, მით უკეთესია ქვეყანაში თემის უფლებრივი მდგომარეობა.

ფოტო: ILGA Europe

ანგარიშში რამდენიმე მნიშვნელოვანი მოვლენაა ასახული. მათ შორის, ქართული ოცნების დეპუტატის, კობა ლურსმანაშვილის ჰომოფობიური განცხადება, კონსტიტუციაში ქორწინების, როგორც ქალისა და მამაკაცის ერთობის განსაზღვრა. ასევე, გურამ კაშიას მხარდამჭერ მატზე აქტივისტებისთვის ლგბტ სიმბოლოების გამოყენების აკრძალვა, 17 მაისის აქციის გაუქმება და ა.შ.

რაც შეეხება სხვა ქვეყნებს, ლგბტ თემის უფლებების დაცვის კუთხით ყველაზე ცუდი ვითარებაა აზერბაიჯანში (3%), თურქეთში (5%), სომხეთსა (7%) და რუსეთში (10%). მონაცემების მიხედვით, ყველაზე მაღალი პროცენტი აქვს მალტას (90%), მეორე ადგილზეა ბელგია (73%), შემდეგ ლუქსემბურგი (70%), მეოთხე ადგილზეა ფინეთი (69%), ხოლო მეხუთეზე — ნორვეგია და დანია თანაბარი 68-68 პროცენტით.

ინდექსის გამოთვლა იმ კრიტერიუმების შეფასებით ხდება, რომლებიც ლგბტი ადამიანების ცხოვრებაზე გავლენას ახდენს, მათ შორისაა: თანასწორობა და დისკრიმინაციისგან თავისუფალი გარემო, სტერეოტიპებით განპირობებული შეურაცხყოფა/ძალადობა, გენდერის ლეგალურად აღიარების საკითხები, გამოხატვის თავისუფლება და თავშესაფრის ძიების მაჩვენებელი. ILGA Europe ლგბტ საკითხებზე მომუშავე ორგანიზაციათა გაერთიანებაა. ორგანიზაცია მსოფლიოს სხვადასხვა ქვეყანაში სექსუალურ უმცირესობათა უფლებების დაცვას აკვირდება.