იუსტიციის უმაღლესი საბჭოს არამოსამართლე წევრი, ნაზი ჯანეზიშვილი მოუწოდებს მოსამართლეებს, მონაწილეობა მიიღონ პარლამენტისათვის წარსადგენი კანდიდატების შერჩევის პროცესში და "გაუწიონ კონკურენცია ჩინჩალაძის კლანს".

"მე მჯერა, რომ ამ ქვეყანაში არის იმდენი კვალიფიციური და ღირსეული იურისტი, რომ შესაძლებელია, 20 ვაკანსიის პირობებში, უზენაესი სასამართლოს სრულად დაკომპლექტებაც კი", — აცხადებს ნაზი ჯანეზიშვილი.

ჯანეზიშვილის თქმით, ახლა არის შანსი, კვალიფიკაცია და კეთილსინდისიერება დაუპირისპირდეს "ჩინჩალაძის კლანის ზრახვებს".

"ამას ვერ მოვახერხებთ, გამოცდილი და ღირსეული იურისტების მონაწილეობის გარეშე უზენაესი სასამართლოს მოსამართლეობის კანდიდატურების შესარჩევ პროცესში. ამიტომ, მიმაჩნია, რომ ამ კონკურსში მონაწილეობა უნდა მიიღონ კომპეტენტურმა იურისტებმა სხვადასხვა სფეროდან და ამ გზით შეიქმნას რეალური კონკურენტული გარემო", — ამბობს ჯანეზიშვილი.

უზენაესი სასამართლოს მოსამართლის 20 ვაკანსიაზე განცხადებების მიღება ხვალიდან, 11 მაისიდან იწყება და გაგრძელდება 31 მაისის ჩათვლით.

პირველ მაისს პარლამენტმა ქართული ოცნების მიერ წარდგენილი საკანონმდებლო ცვლილებები მიიღო, რომელიც კანდიდატი მოსამართლეების შერჩევისა და წარდგენის წესს განსაზღვრავს.

მოსამართლეების კანდიდატურების შერჩევის წესსა და კრიტერიუმებზე პარლამენტმა მას შემდეგ დაიწყო მსჯელობა, რაც დეკემბერის ბოლოს იუსტიციის საბჭოს მიერ წარდგენილ კანდიდატთა სიამ დიდი კრიტიკა გამოიწვია. საბჭოს არამოსამართლე წევრები, პარლამენტარები და არასამთავრობო ორგანიზაციები ამბობდნენ, რომ სია ე.წ. სასამართლოს კლანის მიერ იყო წარდგენილი და მის გაძლიერებას უწყობდა ხელს. სიაში კანდიდატებს შორის იყვნენ როგორც გიორგი მიქაუტაძე, ისე თბილისის სააპელაციო სასამართლოს თავმჯდომარე მიხეილ ჩინჩალაძე და იუსტიციის საბჭოს მოსამართლე წევრი დიმიტრი გვრიტიშვილი.

ქართული ოცნების კანონპროექტს მხარი არ დაუჭირეს ქართული ოცნებიდან წასულმა დეპუტატებმა და საპარლამენტო ოპოზიციამ. ისინი კანონპროექტის მესამე მოსმენიდან მეორე მოსმენაზე დაბრუნებას მოითხოვდნენ. მათი პოზიციით,ქართულმა ოცნებამ არ გაითვალისწინა ვენეციის კომისიისა და სხვა საერთაშორისო ორგანიზაციების რეკომენდაციები და ე.წ. კლანს საშუალება მისცა "უზენაეს სასამართლოშიც გაძლიერებულიყო".

ქართულმა ოცნებამ ვენეციის კომისიის რეკომენდაციათა ნაწილი გაითვალისწინა უზენაესი სასამართლოს მოსამართლეთა შერჩევასთან დაკავშირებით. ვენეციის კომისიის ერთადერთი რეკომენდაცია, რომელიც სრულად გაიზიარა ქართული ოცნების უმრავლესობამ, არამოსამართლე კანდიდატების მიერ საკვალიფიკაციო გამოცდების ჩაბარების საკითხს ეხება. ვენეციის კომისიის რეკომენდაციით და ქართული ოცნების გადაწყვეტილებით, არამოსამართლე კანდიდატები საკვალიფიკაციო გამოცდებს აღარ ჩააბარებენ. ქართულმა ოცნებამ, ასევე, გაითვალისწინა რეკომენდაცია, რომლის მიხედვითაც იუსტიციის საბჭოს წევრი, რომელიც ასევე მოსამართლეობის კანდიდატიცაა ყველა პროცედურიდან გამოირიცხება, თუმცა არ შეცვალა ფარული კენჭისყრის წესი. ვენეციის კომისია იძლეოდა რეკომენდაციას, რომ კენჭისყრა უნდა ყოფილიყო ღია და იუსტიციის საბჭოს წევრებს უნდა დაესაბუთებინათ, რატომ აძლევენ ხმას ამა თუ იმ კანდიდატს.

ამასთან, პარლამენტის პლენარულ სხდომაზე ეკა ბესელიასა და კიდევ 12 დეპუტატის მიერ მომზადებულ საერთო სასამართლოების შესახებ კანონპროექტს პირველი მოსმენით უყარეს კენჭი, თუმცა პროექტი ჩავარდა.