კემბრიჯის ჰერცოგმა და ჰერცოგინიამ, უილიამმა და ქეითმა, ჰარისა და მეგანს შვილის შეძენა საჯაროდაც მიულოცეს.

"აღტაცებული და გახარებული ვარ, როდესაც ყველაფერი დამშვიდდება, მათ მოვინახულებთ. ძალიან მიხარია, რომ ჩემი ძმა იმ ძილნაკლული საზოგადოების წევრი ხდება, რომელსაც მამობა ჰქვია", — თქვა პრინცმა უილიამმა ჟურნალისტებთან.

კითხვაზე, აპირებდა თუ არა ჰარისთვის მამობაზე რჩევების გაზიარებას, უილიამმა სიცილით თქვა:

"უამრავი რჩევა მაქვს, მაგრამ არა. მათ ვუსურვებ, რომ ოჯახში ახალშობილის ყოფნით ისიამოვნონ".

ქეით მიდლტონმა თქვა, რომ მოუთმენლად ელის გაიგოს, რა სახელი შეურჩიეს მეგანმა და ჰარიმ ახალშობილს. რაც შეეხება ჰარის მამას, პრინცი ჩარლზი გერმანიაში ოფიციალური ვიზიტით იმყოფება და ის თავის მეოთხე შვილიშვილს ინგლისში დაბრუნებისთანავე მოინახულებს.

მეგან მარკლი და პრინცი ჰარი შვილის სახელს დღეს, 8 მაისს გაასაჯაროებენ და მას მსოფლიოს წარუდგენენ.

მშობიარობიდან ორი დღის შემდეგ, მეგანი ჰარისთან ერთად საჯაროდ გამოვა და ფოტოგრაფებს სურათების გადაღების საშუალებას მისცემს.