თბილისი პრაიდმა პრომოვიდეო გამოაქვეყნა. ისინი მოქალაქეებს მოუწოდებენ, თუ მათთვის ადამიანების ჩაგვრა მიუღებელია, ღირსების მარშს შეუერთდნენ.

თბილისი პრაიდის ერთ-ერთი ორგანიზატორი, გვანცა ძერყორაშვილი On.ge-სთან ამბობს, რომ მუსიკა და ცეკვა ქართველი ადამიანის იდენტობის განუყოფელი ნაწილია და გამონაკლისი არც საქართველოში მცხოვრები ლგბტქ ადამიანები არიან.

"ქართული მუსიკისა და ცეკვის ელემენტები ჰარმონიულად ერწყმის ქვიარ კულტურას, ხდის მას უნიკალურსა და საინტერესოს. ამიტომ თბილისი პრაიდის პრომოვიდეოს მუსიკა ქართული საბრძოლო მუსიკისა და ჰაუსის, ხოლო ცეკვა — შევეცადეთ ხორუმისა და ვოგის ელემენტებზე აგვეგო", — ამბობს ის.

თბილისში 18-დან 23 ივნისის ჩათვლით პრაიდის კვირეული გაიმართება. კვირეულის ფარგლებში სხვადასხვა სოციალური, კულტურული და პოლიტიკური ღონისძიება გაიმართება. კვირეული ღირსების მარშით დასრულდება.