ადამიანის უფლებათა კომიტეტში შრომის უსაფრთხოების შესახებ მოსმენა მედიისთვის დახურული იყო. საკომიტეტო მოსმენა 1 მაისს, მშრომელთა საერთაშორისო სოლიდარობის დღეს უკავშირდებოდა. შეხვედრაზე შრომის უსაფრთხოების კანონის ამოქმედების შემდეგ შუალედური ანგარიში წარადგინეს.

სხდომის დასრულების შემდეგ მედიისთვის მხოლოდ ის გახდა ცნობილი, რომ პარლამენტში შრომის უსაფრთხოების საკითხებზე თემატური მოკვლევის ჯგუფი შეიქმნება. ადამიანის უფლებათა კომიტეტის პრესსამსახურმა ასევე გაავრცელა სოფო კილაძის კომენტარი, სადაც დეპუტატი ამბობს, რომ "გამოიკვეთა მთელი რიგი გამოწვევები, რომლებიც სასწრაფო გადაჭრას საჭიროებს".

On.ge-ს კითხვაზე, რატომ დაიხურა მაღალი საჯარო ინტერესის მქონე სხდომა, სოფო კილაძემ განაცხადა: "იმ მიზეზით დაიხურა, რომ შეხვედრა მაქსიმალურად საქმიანი და შედეგზე ორიენტირებული ყოფილიყო".

კილაძის თქმით, გამოცდილებამ გვაჩვენა, რომ როდესაც სხდომები ღიაა, ხშირია პოლიტიკური სპეკულაციები და ქულების ჩაწერის მცდელობა, რაც საქმიან პროცესს აფერხებს და აქცენტები სხვა მიმართულებით კეთდება.

"ჩვენი მიზანია კონკრეტული შედეგის დადება, რათა მომავალში არცერთი ადამიანი არ დაიღუპოს სამუშაო ადგილზე", — განაცხადა კომიტეტის თავმჯდომარემ.

საკომიტეტო მოსმენაზე ანგარიშით წარდგნენ: ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე თამილა ბარკალაია; ეკონომიკისა და მდგრადი განვითარების მინისტრის მოადგილე ეკატერინე მიქაბაძე; თბილისის მერიის მუნიციპალური ინსპექციის უფროსი გიორგი ბაგრატიონი. მოსმენას ასევე ესწრებოდნენ პროფკავშირების, არასამთავრობო ორგანიზაციების, ბიზნეს ასოციაციების წარმომადგენლები და საერთაშორისო პარტნიორები.

ახალი ორგანული კანონის შრომის უსაფრთხოების შესახებ ერთი ნაწილი 2019 წლის მარტში ამოქმედდა, კანონი სრული დატვირთვით 2019 წლის 1 სექტემბრიდან ამოქმედდება.