უმრავლესობის მიერ მომზადებული კანონპროექტს უზენაესის მოსამართლეთა არჩევის შესახებ ხმა საპარლამენტო უმრავლესობის ორმა წევრმა, ლევან კობერიძემ და ალექსანდრე ერქვანიამ არ მისცა.

კანონპროექტს კენჭი რამდენიმე წუთის წინ უყარეს და მესამე მოსმენით დაამტკიცეს. პროექტს მხარი 87-მა დეპუტატმა დაუჭირა, 33 წინააღმდეგი იყო.

კანონპროექტს მხარი არ დაუჭირეს ქართული ოცნებიდან წასულმა დეპუტატებმა და საპარლამენტო ოპოზიციამ. ისინი კანონპროექტის მესამე მოსმენიდან მეორე მოსმენაზე დაბრუნებას მოითხოვდნენ. მათი პოზიციით, ქართულმა ოცნებამ არ გაითვალისწინა ვენეციის კომისიისა და სხვა საერთაშორისო ორგანიზაციების რეკომენდაციები და ე.წ. კლანს საშუალება მისცა "უზენაეს სასამართლოშიც გაძლიერებულიყო".

ქართულმა ოცნების მიერ მომზადებულ კანონპროექტი უზენაესის მოსამართლეების არჩევის შესახებ ცვლილებები ვენეციის კომისიის დასკვნის შემდეგ შევიდა. ვენეციის კომისიის ერთადერთი რეკომენდაცია, რომელიც სრულად გაიზიარა ქართული ოცნების უმრავლესობამ, არამოსამართლე კანდიდატების მიერ საკვალიფიკაციო გამოცდების ჩაბარების საკითხს ეხება. ვენეციის კომისიის რეკომენდაციით და ქართული ოცნების გადაწყვეტილებით, არამოსამართლე კანდიდატები საკვალიფიკაციო გამოცდებს აღარ ჩააბარებენ. ქართულმა ოცნებამ ასევე გაითვალისწინა რეკომენდაცია, რომლის მიხედვითაც იუსტიციის საბჭოს წევრი, რომელიც ასევე მოსამართლეობის კანდიდატიცაა ყველა პროცედურიდან გამოირიცხება, თუმცა არ შეცვალა ფარული კენჭისყრის წესი. ვენეციის კომისია იძლეოდა რეკომენდაციას, რომ კენჭისყრა უნდა ყოფილიყო ღია და იუსტიციის საბჭოს წევრებს უნდა დაესაბუთებინათ, რატომ აძლევენ ხმას ამა თუ იმ კანდიდატს.

ამასთან, პარლამენტის პლენარულ სხდომაზე დღეს ეკა ბესელიასა და კიდევ 12 დეპუტატის მიერ მომზადებულ საერთო სასამართლოების შესახებ კანონპროექტს პირველი მოსმენით უყარეს კენჭი, თუმცა პროექტი ჩავარდა.

გაიგე მეტი: ვინ (არ) დაუჭირა მხარი უზენაესის მოსამართლეთა არჩევის კანონპროექტს