"სამწუხაროდ, ყოველთვის იყვნენ და ახლა, მითუმეტეს, მრავლად არიან კადნიერნი, რომელნიც უარყოფენ ღვთის არსებობას, ან შემოქმედს სამართალს უწუნებენ და მიაჩნიათ, რომ თვითონ უნდა შექმნან ახალი რეალობა, ახალი სამყარო", — ამის შესახებ პატრიარქის ილია მეორეს 2019 წლის სააღდგომო ეპისტოლეშია ნათქვამი.

პატრიარქი ფიქრობს, რომ "ათეისტური სულისკვეთების მქონენი ეყრდნობიან თავის გონებას და იმ მონაცემებს, რისი შეცნობის საშუალებასაც ჩვენი გრძნობის ხუთი ორგანო იძლევა".

"მათ არ იციან და არც სურთ იცოდნენ რაიმე ადამიანის ბუნების საუკეთესო და ყველაზე მნიშვნელოვან ნაწილზე, სულიერ ცხოვრებაზე. მათთვის სიტყვა "ცოდვა", "განწმენდა-კათარზისი", ისეთივე გაუგებარია, როგორც "თავმდაბლობა" ან "სინანულის განცდა". ასეთთა შორის, როგორც წესი, სხეული და მიწა ბატონობს და არა ზეცა და სული", — ნათქვამია ეპისტოლეში.

ამავე ტექსტის მიხედვით, "შეიძლება იცხოვრო ქრისტეს გარეშე, მისი სწავლების გარეშე, აქციო შენი თავი ვნებების სათარეშოდ, მაგრამ სიკვდილს ვერ დაემალები და ვერც საშინელ სამსჯავროს გადურჩები".

ილია მეორე ეპისტოლეში წერს რომ მსოფლიოში ათეისტური ტალღა გაძლიერდა.

"დღეს, როდესაც მსოფლიოში ათეისტური ტალღა გაძლიერდა და მისი გავლენა ჩვენს ქვეყანაშიც იგრძნობა, თვალნათელი გახდა, როგორ დეგრადირდება ადამიანი უფლის გარეშე, როგორ ადვილად გადაგვარებადია იგი, როგორი უგუნური და თვითგანადგურებისაკენ მიდრეკილი ხდება ის", — ამბობს პატრიარქი.

მისივე თქმით,ბოროტი ძალა, შეფარვით თუ აშკარად, ყოველთვის ებრძოდა ჭეშმარიტებას და ყოველთვის სხვადასხვა სახე ჰქონდა, ჯერ კომუნისტური რეჟიმით დაიწყო შემდეგ კი ცალკეული პირების სახით გაგრძელდა.

"ახლა კი, შეიძლება ითქვას, გამოცხადებულია სრული თავისუფლება როგორც მორწმუნეთა, ისე ურწმუნოთა მიმართ, მაგრამ ამ სივრცეში მკვეთრად იგრძნობა ღვთის უარმყოფელთა სითამამე; ისინი სრული თავაშვებულების პროპაგანდას აქტიურად ეწევიან ყველა საშუალებით და ცდილობენ, ეს ქმედება სიმართლისა და სიკეთის სახელს დაუკავშირონ, რათა თავისი გაუკუღმართებული შემოთავაზებანი ხალხისთვის მისაღები გახადონ", — ვკითხულობთ ეპისტოლეში.

პატრიარქი ფიქრობს, რომ ცოდვა როგორც მადლი, გადამდებია და "ამის ნაყოფს უკვე ვიმკით საზოგადოების ყველა ფენაში".

"დღეს მორწმუნე ადამიანს დიდი მოთმინება მართებს, რომ ამდენ ტყუილს, ცილისწამებასა და ღვარძლს გაუძლოს და თვითონაც არ გადაგვარდეს. ჩვენი შესაძლებლობებით ეს მიუღწეველია, ღვთის დახმარებით კი, შესაძლებელი. აუცილებელია, უფალთან სულიერი, ლოცვითი ურთიერთობა, ბიბლიისა და წმინდა მამების დარიგებების კითხვა, რომ განვმტკიცდეთ და შეწევნაც ღვთისა მივიღოთ", — ვკითხულობთ ეპისტოლეში.

პირველი შემთხვევა არ არის, როცა პატრიარქი სააღდგომო ეპისტოლეში ათეიზმზე საუბრობს. 2014-2015 წლების ეპისტოლეებში ათეიზმის განვითარებასა და მის განვითარებაზეც იყო მოკლედ საუბარი.

გაიგე მეტი: ილია მეორეს 2019 წლის სააღდგომო ეპისტოლე — სრულად