ნაციონალური მოძრაობის წევრი, სალომე სამადაშვილი ამბობს, რომ ამერიკელი კონგრესმენის კანონპროექტი საქართველოსთვის სანქციების დაწესების შესახებ ჩვენი სახელმწიფოსთვის დამაზიანებელია. მისივე თქმით, აღნიშნული პროექტის შექმნა თიბისი ბანკისა და ანაკლიის პორტის გარშემო მიმდინარე მოვლენებს უკავშირდება.

"მიუხედავად იმისა, ამ კანონპროექტს მიიღებენ თუ არ მიიღებენ კონგრესში, მისი არსებობა უკვე თავისთავად შეიძლება ითქვას, რომ არის უკიდურესად დამაზიანებელი საქართველოში უცხოური ინვესტიციების მოზიდვის თვალსაზრისით", — აღნიშნა სამადაშვილმა რუსთავი 2-თან.

აშშ-ს კონგრესში დარეგისტრირდა კანონპროექტი, რომლითაც საქართველოს წინააღმდეგ შესაძლოა სანქციები ამოქმედდეს. კანონპროექტის ავტორი რესპუბლიკელი კონგრესმენი მარკვეინ მალინმია.

კანონპროექტის ტექსტის მიხედვით, საქართველოს წინააღმდეგ სანქციები იმ შემთხვევაში ამოქმედდება, თუ დადგინდება, რომ მთავრობის ქმედებები არღვევს ამერიკელ ბიზნესმენებთან დადებულ ხელშეკრულებებს და აღებულ ვალდებულებებს.

რესპუბლიკერი კონგრესმენის ინიციატივით, მსგავს შემთხვევებში აშშ საქართველოს ფინანსურ დახმარებას შეუჩერებს, კონკრეტულ პირებს კი შეერთებულ შტატებში შესვლა აეკრძალებათ და აღარც ვიზებით ისარგებლებენ.