ქართული ოცნების დეპუტატი, ლევან კობერიძე ერთ-ერთია იმ სამი პარლამენტარიდან, რომელმაც დღეს, 19 აპრილის კენჭისყრაზე მოსამართლეებზე კანონპროექტს მხარი არ დაუჭირა. მან ჟურნალისტებთან განმარტა, რომ "საკმარისად არ მიიჩნია" შეტანილი ცვლილებები, იმისათვის რომ მწვანე ღილაკისთვის დაეჭირა ხელი.

ლევან კობერიძემ აღნიშნა ისიც, რომ პარტიის თავმჯდომარის, ბიძინა ივანიშვილის თანდასწრებით აზრი დააფიქსირა, რომ ასეთი ფორმით წინააღმდეგ მისცემდა ხმას:

"ჩემთვის ერთ-ერთი ყველაზე მნიშვნელოვანი იყო ფარულობის თემა, კენჭისყრის საკითხი. მე ჩემი განცხადება მანამდეც გავაკეთე გუნდის შიგნით და არ მქონია არავისგან დაფარული, თუ რა შემთხვევაში დავუჭერდი მხარს და რა შემთხვევაში არ დავუჭერდი".

დღევანდელი სხდომის ბოლოს საპარლამენტო უმრავლესობის მიერ მომზადებული კანონპროექტი საერთო სასამართლოების შესახებ დეპუტატებმა მეორე მოსმენით მიიღეს. პროექტს 87-მა პარლამენტარმა დაუჭირა მხარი, 31-მა კი წინააღმდეგ მისცა ხმა.

კანონპროექტზე ვენეციის კომისიამ რეკომენდაციები 16 აპრილს გამოაქვეყნა. საპარლამენტო უმრავლესობა ირწმუნება, რომ დასკვნა პოზიტიურია, არასამთავრობო სექტორი და ოპოზიცია კი მიიჩნევს, რომ ვენეციის კომისია მოსალოდნელზე მეტად კრიტიკული იყო.