საქართველოს პრემიერ-მინისტრმა, მამუკა ბახტაძემ განაცხადა, რომ ავლაბრის რეზიდენციას საზოგადოებრივი და სამუზეუმო სივრცის ფუნქცია ექნება.

მისივე თქმით, ამ სივრცეში საქართველოს ყველა მოქალაქეს და საქართველოში ჩამოსულ ყველა ტურისტს შეეძლება მისვლა და ჩვენი ეროვნული საგანძურის ნახვა. ამასთანავე, შენობას ექნება რამდენიმე ფუნქცია, მათ შორის მაღალი რანგის სტუმრების მასპინძლობა.

"თქვენ კითხვას სვამთ, რატომ გვექნება ორმაგი ხარჯი. ამ ორ შენობას სხვადასხვა ფუნქცია აქვს. ეს ერთი და იგივე ფუნქცია არ არის. ეს არ არის საპრეზიდენტო სასახლე. ეს შენობა აშენდა საქართველოს მოქალაქეების ფულით, გადამხდელების თანხით და მას უნდა ჰქონდეს საზოგადოებრივი ფუნქცია, ეს საზოგადოებრივი ფუნქცია იქნება უზრუნველყოფილი ამ რამდენიმე მიმართულებით, რომელიც, ჩემი აზრით, არის ძალიან მნიშვნელოვანი, როგორც სახელმწიფოებრივი, ისე ეკონომიკური კონტექსტიდან გამომდინარე", — განაცხადა ბახტაძემ.

ავლაბრის რეზიდენცია დაპირისპირების საკითხი ჯერ კიდევ გიორგი მარგველაშვილის პრეზიდენტობის დროს გახდა. მაშინდელმა პრეზიდენტმა უარი განაცხადა სასახლის დატოვებაზე და სხვაგან გადასვლაზე, რაც მმართველმა პარტიამ გააპროტესტა. სალომე ზურაბიშვილმა, ჯერ კიდევ საპრეზიდენტო არჩევნების დროს განაცხადა, რომ ის ავლაბრის რეზიდენციაში არ გადავიდოდა, რადგან იქაური ჰავა და აურა არ უხდებოდა. რეზიდენციას ის ფსევდო რაიხსტაგს უწოდებდა. არჩევის შემდეგ ზურაბიშვილი ათონელის რეზიდენციაში შევიდა. რამდენიმე თვეში ცნობილი გახდა, რომ ზურაბიშვილი ოფიციალურ ვიზიტებს ავლაბრის რეზიდენციაში მიღებდა