ქართული ოცნების კანონპროექტის განხილვას უზენაესის მოსამართლეთა არჩევის წესის შესახებ იურიდიულ საკითხთა კომიტეტზე არასამთავრობო ორგანიზაციების წარმომადგენლებიც ესწრებიან. ისინი კომიტეტზე მოვიდნენ მაიუსურებით, რომელსაც აქვს წარწერა: "კლანი უნდა წავიდეს".

ფოტო: გვანცა ნემსაძე / On.ge

არასამთავრობო ორგანიზაციების წარმომადგენლების განცხადებით, ქართულმა ოცნებამ მოატყუა საზოგადოება, როცა თქვა, რომ კანონპროექტს ვენეციის კომისიის დასკვნამდე არ განიხილავდა.

"დღეს საერთოდ არ უნდა იყოს ეს საკითხი დღის წესრიგის ნაწილი. დღეს კომიტეტზე ამ საკითხის განხილვა არის საზოგადოების შეცდომაში შეყვანა. ქართული ოცნება იმის ნაცვლად, რომ ნორმების შეცვლაზე ფიქრობდეს კანონპროექტში, ისეთი კანონპროექტის განხილვაზე ფიქრობენ, რაც დააზღვევდა კლანის გაძლიერებას, ჩვენ ვესწრებით კომიტეტს, სადაც დასკვნასაც კი არ ელოდება ქართული ოცნება", — განუცხადა On.ge-ს საქართველოს ახალგაზრდა იურისტთა ასოციაციის თავმჯდომარემ, სულხან სალაძემ.

იურიდიულ საკითხთა კომიტეტის თავმჯდომარის ანრი ოხანაშვილის თქმით, ვენეციის კომისიის დასკვნა მოსამართლეების შესარჩევ კანონპროექტზე ხვალ გამოქვეყნდება და ისინი გაითვალისწინებენ შენიშვნებს. ანრი ოხანაშვილის განცხადებით, ამის საშუალებას ახალი რეგლამენტი იძლევა და "სპეკულაციაა განცხადებები, რომ ქართული ოცნება ვენეციის კომისიის დასკვნას არ ელოდება".

საპარლამენტო უმრავლესობის მიერ შემუშავებულ კანონპროექტში წერია, რომ უზენაესი სასამართლოს მოსამართლეობის კანდიდატი შეიძლება იყოს პირი, რომელიც არის მოქმედი ან ყოფილი მოსამართლე და აქვს ჩაბარებული მოსამართლეთა საკვალიფიკაციო გამოცდა. კანდიდატები ღია კონკურსის საფუძველზე შეირჩევიან. კონკურსანტებს აარჩევს იუსტიციის უმაღლესი საბჭო წევრების 2/3-ის თანხმობით, ანუ 15-დან 10 ხმით. საბოლოოდ, პარლამენტში სამუშაო ჯგუფი შეიქმნება, სადაც წარდგენილ კანდიდატებს მოუსმენენ და მის წარსულ საქმიანობასაც შეისწავლიან.

ამავე თემაზე: