უზენაესი სასამართლოს ყოფილმა მოსამართლემ, თამარ ლალიაშვილმა, სტრასბურგში სასამართლო დავა მოიგო. საქმე ეხება 2006 წელს უზენაესი სასამართლოდან განთავისუფლებულ ე.წ. მეამბოხე მოსამართლეების შემთხვევას. სტრასბურგის სასამართლოს გადაწყვეტილბით თამარ ლალიაშვილს საქართველომ სანქციის სახით 10 ათასი ევრო უნდა გადაუხადოს.

"ლევან მურუსიძე იყო ერთ-ერთი ავტორი, ვინც ამ გადაწყვეტილებას ხელი მოაწერა... ხაზს გავუსვამ, რომ ლევან მურუსიძე სწორედ ჩვენს გამო დანიშნეს უზენაეს სასამართლოს მოსამართლედ დაინიშნა და შედიოდა სადისციპლინო პალატაში. პარლამენტმა მისცა ხმა მურუსიძის კანდიდატურას და მისი დანიშნულება სწორედ ჩვენი გათავისუფლება იყო. შემდეგ უკვე გაგრძელდა გადაწყვეტილებები, როგორიც იყო მოლაშვილის საქმე და ა.შ. ლევან მურუსიძის უკანონო გადაწყვეტილებების შედეგია ის უზარმაზარი სანქციები, რომელიც ჯერ კიდევ ეკისრება სახელმწიფოს. ძალიან ბევრი საქმეებია, რომლის ავტორიც არის ლევან მურუსიძე", — აღნიშნა თამარ ლალიაშვილმა პირველ არხთან საუბრისას.

თამარ ლალიაშვილის თქმით ევროპული სასამართლოს შემდეგ განცხადებით მიმართა უზენაეს სასამართლოს და მოსამართლეობიდან გათავისუფლების შესახებ მაშინდელი გადაწყვეტილების გაუქმება მოითხოვა. ის დავას ხელფასის განაცდურის, პენსიისა და მორალური ზიანის კომპენსაციისთვის გააგრძელებს.

ე.წ. მეამბოხე მოსამართლეების საქმე

მეამბოხე მოსამართლეების სახელით ცნობილი საქმე იმ პერიოდს უკავშირდება, როცა მურუსიძე უზენაესი სასამართლოს კოლეგიის წევრი იყო. ნაციონალურმა მოძრაობამ ხელისუფლებაში მოსვლის შემდეგ ღიად დააფიქსირა სასამართლო ხელისუფლების გადახალისების სურვილი. მათ მოსამართლეებს სოციალური გარანტიების შეთავაზებით თანამდებობის დატოვებისკენ მოუწოდეს. ნაწილი შეთავაზებას დათანხმდა, ნაწილმა პოსტი ნებაყოფლობით არ დატოვა. მათ მიმართ წინასწარ გაცხადებული "დისციპლინური ომი" დაიწყო.

2005 წლის ზაფხულში იუსტიციის საბჭოში დისციპლინური დევნა დაიწყეს 15-ზე მეტი მოსამართლის წინააღმდეგ, მათ შორის იყვნენ: ე.წ. მეამბოხე მოსამართლეები: ნინო გვენეტაძე, მერაბ ტურავა, თამარ ლალიაშვილი და მურმან ისაევი. სადისციპლინო კოლეგიამ მოსამართლეების ნაწილი გაამართლა, ნაწილს შენიშვნა და საყვედური მისცა. კანონის თავისებური ინტერპრეტაციის ბრალდებით ე.წ. მეამბოხე ოთხეული ყველაზე მკაცრი სასჯელით, მოსამართლეობიდან გათავისუფლებით დასაჯეს.

უზენაესი სასამართლოს პალატის წევრთა ხმები ასე გადანაწილდა: მოსამართლეების დასჯას უზენაესი სასამართლოს თავმჯდომარის, კოტე კუბლაშვილის მოადგილეებმა, მიხეილ გოგიაშვილმა და ლევან მურუსიძემ დაუჭირეს მხარი. პალატის მესამე წევრი, თეიმურაზ თორდია მოსამართლეების გამართლებას ითხოვდა. გადამწყვეტი მურუსიძის ხმა აღმოჩნდა. მან მოსამართლეების სასჯელი ძალაში დატოვა.

ვენეციის კომისია ამ გადაწყვეტილებაზე წერდა, რომ "პოლიტიკური ანგარიშსწორებისთვის მოსამართლეების გათავისუფლება დაუშვებელი იყო".

ამ საქმის ერთ-ერთი ფიგურანტი ნინო გვენეტაძე უზენაესი სასამართლოს თავმჯდომარედ დაინიშნა და ხელმძღვანელობდა იუსტიციის უმაღლეს საბჭოს. მან თანამდებობა 2018 წლის 2 აგვისტოს დატოვა. გვენეტაძის თქმით, ის მუქარის მსხვერპლი იყო.

სწორედ ნინო გვენეტაძის მონაწილეობით გაიმართა იუსტიციის საბჭოში მოსამართლეებთან გასაუბრება, სადაც ლევან მურუსიძე სააპელაციო სასამართლოს მოსამართლედ აირჩიეს.