27 მარტს აშშ-ის წარმომადგენელთა პალატის საგარეო ურთიერთობათა კომიტეტზე აშშ-ის სახელმწიფო მდივანმა, მაიკ პომპეომ თქვა, რომ აშშ მზადაა კვლავ დაეხმაროს ქართველ ხალხს, რომელიც "ძალიან კეთილგანწყობილია აშშ-ს მიმართ და იზიარებს აშშ-ს ხედვას, რეგიონში ოპერირების კუთხით". ამის შესახებ პომპეომ ოჰაიოს შტატიდან რესპუბლიკელი კონგრესმენის, სტივ ჩაბოს კითხვის პასუხად თქვა. მან სახელმწიფო მდივანს უკრაინასა და საქართველოზე დაუსვა შეკითხვა, ყურადღება გაამახვილა რუსეთის აგრესიაზე და ხაზი გაუსვა აშშ-ის მხრიდან საქართველოსა და უკრაინისადმი მხარდაჭერის გაძლიერებას, 2020 ბიუჯეტის ფარგლებში.

"საქართველო და უკრაინა ორივე პუტინის მხრიდან ინტენსიური და მუდმივი ზეწოლის წინაშე არიან. ორივე ამ ქვეყნის ტერიტორია უკანონოდ არის რუსეთის კონტროლის ქვეშ. ამ რისკების მიუხედავად საქართველო და უკრაინა და ასევე აღმოსავლეთ ევროპის მრავალი ქვეყანა აქტიურად ახორციელებს პროდასავლურ პოლიტიკას. თუ შეიძლება გვითხარით, თუ როგორ აძლიერებს პრეზიდენტის ბიუჯეტი ჩვენი ამ უმნიშვნელოვანესი პარტნიორებისადმი მხარდაჭერას?" — ჰკითხა კონგრესმენმა.

სახელმწიფო მდივანი ამბობს, რომ უკრაინას ხელშესახები დახმარება გაუწიეს, მათ შორის მიაწოდეს თავდაცვითი სახის შეიარაღება, დაზვერვითი სახის ინფორმაცია.

"თქვენ ხედავთ ჩვენს ძალისხმევებს მსოფლიოში, მათ შორის უკრაინასა და საქართველოში, რათა შევეწინააღმდეგოთ რუსეთის ძალისხმევებს. მალე არჩევნები ახლოვდება უკრაინაში. მრავალი ელემენტია ამ მიმართულებით და მე ვსაუბრობდი ამის შესახებ, რაშიც, როგორც სახელმწიფო დეპარტამენტი, ასევე თავდაცვის დეპარტამენტია ჩართული", — უპასუხა აშშ-ის სახელმწიფო მდივნმა, მაიკ პომპეომ.

მაიკ პომპეოს კომიტეტში სახელმწიფო დეპარტამენტის საგარეო პოლიტიკის სტრატეგია და 2020 ფისკალური წლის ბიუჯეტის საკითხზე უსმენდნენ.