"აგერ ხართ თქვენ და აგერ ვარ მე, აპრილის თვეში დამიძახეთ და ვნახოთ როგორი იქნება ციფრები", — ასე უპასუხა შინაგან საქმეთა მინისტრმა, გიორგი გახარიამ კითხვას კრიმინალის სტატისტიკის ზრდის შესახებ.

შინაგან საქმეთა მინისტრი ამბობს, რომ არავინ უარყოფს ციფრების ზრდას, მაგრამ ეს სხვადასხვა ფაქტორებზეა დამოკიდებულებები, მათ შორის სტატისტიკის შედგენის მეთოდოლოგიაზე და მიმართვიანობის გაზრდაზე. ამის შესახებ მან TV პირველის ეთერში ისაუბრა.

"ოჯახში ძალადობა და ყველა სახის სტიგმატიზირებული დანაშაული, რომელზეც საზოგადოებასთან ერთად ძალიან მნიშვნელოვანი მუშაობა გავწიეთ და მომართვიანობა მართლა გაიზარდა, გაჩნდა ბევრი ისეთი დანაშაული, რომელიც მანამდე საერთოდ არ აღირიცხებოდა", — განაცხადა მინისტრმა.

გახარიამ აღნიშნა, რომ მის მინისტრობამდე დანაშაულის ნაწილი არ აღირიცხებოდა, რის გამოც სტატისტიკური მაჩვენებელი უფრო გაიზრდა. ჟურნალისტის კითხვაზე, მალავდნენ თუ არა მანამდე დანაშაულის სტატისტიკას, გახარიამ უპასუხა, რომ "ალამაზებდნენ".

კრიმინალის სტატისტიკის ზრდის შესახებ დღეს გიორგი გახარიას და პრემიერ-მინისტრ მამუკა ბახტაძეს პარლამენტში უსმენდნენ.