ჩვენი მთავარი მტერი თუ ფიქრობს, რომ საქართველოსთვის ტერიტორიული პრობლემები ოდესმე მეორე ან თუნდაც, მეათე ხარისხოვანი იქნება, ძალიან ცდება. დღეს პატარა ლუკას შესახებ მოგიყვებით, რომელსაც წინ დიდებული გეგმები აქვს და რომელიც ნათელი მაგალითია იმისა, რომ რუსეთის მიერ ჩვენი ქვეყნის ოკუპაცია თანაბრად ადარდებს დიდსა, თუ პატარას.

ამ მამაც ბიჭს პროფესიით გენერალი უნდა, რომ გამოვიდეს და მთელი თავისი ცხოვრება საქართველოს უსაფრთხოების დაცვას მიუძღვნას.

"მინდა, რომ გამოვიდე პროფესიით გენერალი. მინდა ვიდგე პერევში, გავწრთვნა ბევრი ჯარისკაცი. მინდა ჩემი გაწვრთვნილი ჯარისკაცები ჩემსავით გმირები და თავდადებულები იყვნენ. მე პერევში იმიტომ მინდა დადგომა, რომ ის ჩემი სოფელია და ვხედავ როგორ დადიან ეს რუსები. არ მიშვებენ ჩემს მამიდებთან. ერთხელ მინდოდა საბუთების გაკეთება, მაგრამ ბებომ მითხრა მაგისთვის საჭიროა თქვა: მე ქართველი არ ვარ, მე ვარ რუსიო. შემდეგ თავი დავანებე. მე ვხედავ ქართველი ჯარისკაცები როგორ იცავენ საზღვარს. მე მინდა მათზე უკეთესი ვიყო, საქართველოს გავადიდებ.

გენერალი ბრძოლაში კურთხეულად მოკვდება. გენერალი თავის სამშობლოს არასდროს არ უღალატებს. აი, ასეთი ვიქნები მე, დიახ! მე ქართველი ვარ და ვამაყობ კიდეც ამით. დამელოდე საქართველო", — წერს საჩხერის ნომერ პირველი სკოლის მოსწავლე ლუკა ტოროშელიძე, რომელიც საკუთარი სკოლის საამაყო მოსწავლედ ითვლება.

ამ გულისამაჩუყებელი წერილის წაკითხვის შემდეგ ჩვენ ისღა დაგვრჩენია, რომ პატარა ლუკას გამთლიანებულ, მშვიდობიან საქართველოში ცხოვრება ვუსურვოთ.